ჩინეთის ჯანდაცვის ეროვნული კომისიის განცხადებით, აპრილში შეიძლება უკვე მზად იყოს ახალი კორონავირუსის პირველი ვაქცინა „გადაუდებელი გამოყენებისთვის“.
ჩინეთის ჯანდაცვის სექტორის ხელმძღვანელთა განცხადებით, ქვეყანა სრული ძალებით არის გადართული ახალი კორონავირუსის საწინააღმდეგო ვაქცინის შექმნაზე. ვირუსით მსოფლიოში უკვე 100 000-ზე მეტი ადამიანია ინფიცირებული, 3000-ზე მეტი კი გარდაცვლილი.
„ჩვენი შეფასებით, იმედი გვაქვს, რომ აპრილში გარკვეული ვაქცინები კლინიკური ცდის ეტაპზე გადავა ანდაც მზად იქნება საგანგებო სიტუაციებში გამოყენებისთვის“, — ამბობს ჩინეთის ჯანდაცვის ეროვნული კომისიის მეცნიერებისა და განვითარების ცენტრის დირექტორი ჟენგ ჟონგვეი.
მისივე თქმით, პროცესში ჩართულია ვაქცინების კვლევის ათეულობით ჩინური დაწესებულება და მიმდინარეობს სხვადასხვა ტიპის ვაქცინებზე მუშაობა.
უსაფრთხო და ეფექტიანი ვაქცინების შექმნას სჭირდება დრო, ინვესტირება და კარგი მეცნიერები. დაავადება COVID-19-ის გამომწვევ და მის მსგავს კორონავირუსთა შემთხვევაში, ეს პროცესი კიდევ უფრო მეტი გამოწვევითაა სავსე. ექსპერტთა განცხადებით, მხოლოდ უსაფრთხოებასა და ეფექტიანობაზე ტესტირებას 12-18 თვე ან მეტი სჭირდება.
ჩინეთის კანონმდებლობით, შესაძლებელია საზოგადოებრივი ჯანდაცვის საგანგებო მდგომარეობებისათვის შექმნილი ვაქცინების გადაუდებელი გამოყენება სპეციფიკური პირობებით. თუმცა, ამისათვის საჭიროა, სამედიცინო პროდუქტების ეროვნულმა ადმინისტრაციამ ჩათვალოს, რომ მკურნალობის შედეგები რისკებს გადაწონის.
თებერვლის დასაწყისში, ჩინეთმა მსოფლიოს ამცნო, რომ ვაქცინის კლინიკური ცდება შეიძლება აპრილში დაიწყოს.