თუ ერთიანები არ ვიქნებით, იტალია, ესპანეთი და სხვა ქვეყნები სამართლიანად მოგვაძახებენ, სად იყავით მაშინ, როდესაც ფრონტის წინა ხაზზე ვიყავით? არ მსურს ეგოისტი და დაყოფილი ევროპა, – ამის შესახებ საფრანგეთის პრეზიდენტმა ემანუელ მაკრონმა Stampa, Repubblica და Corriere della Sera-სთვის მიცემულ ინტერვიუში განაცხადა.
„საფრანგეთი იტალიის გვერდით დგას. ბევრს საუბრობენ ჩინეთისა და რუსეთის მიერ იტალიისათვის გაწეულ დახმარებაზე, მაგრამ რატომ არ ამბობენ, რომ საფრანგეთმა და გერმანიამ 2 მილიონი პირბადე და ათი ათასობით სამედიცინო ხალათი გაუგზავნეს იტალიას? ეს საკმარისი არ არის, თუმცა ეს დასაწყისია“, – განაცხადა საფრანგეთის პრეზიდენტმა.
მისივე თქმით, ევროპელებმა დახმარება გაუწიეს ჩინეთს, როდესაც იქ ეპიდემიამ იფეთქა.
„ევროპა ამაყი უნდა იყოს და თავს ძლიერად გრძნობდეს, რადგან ასეც არის. თუმცა, უფრო შორს უნდა წავიდეთ“, – დასძინა ემანუელ მაკრონმა.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.