პიანისტი ელისო ბოლქვაძე “ნაციონალური მოძრაობის“ მთაწმინდის მაჟორიტარობის კანდიდატის, ნიკა რურუას წინასაარჩევნო კლიპში თავისი კადრების გამოყენებას აპროტესტებს.
როგორც ტელეკომპანია “იმედს“ სატელეფონო საუბრისას ბოლქვაძემ განუცხადა, მიუხედავად იმისა, რომ 2011 წელს თბილისში გამართული კონცერტის კადრები საჯაროა, წინააღმდეგია მასთან შეთანხმების გარეშე პოლიტიკოსებმა ის წინასაარჩევნო კლიპებში გამოიყენონ.
“არაკორექტულია პოლიტიკოსების წინასაარჩევნო კლიპში ჩემი სახელის გამოყენება ისე, რომ მე არ მკითხონ. ერთადერთი ჩემი ენა არის მუსიკის და მშვიდობის ენა. მე “ნაციონალური მოძრაობის“ ღირებულებებთან ახლოს არ ვდგავარ და არც ამ პარტიის წარმომადგენელი ვარ“,-განაცხადა პიანისტმა.
“ნაციონალური მოძრაობის“ მთაწმინდის მაჟორიტარობის კანდიდატის ნიკა რურუას წინასაარჩევნო ვიდეორგოლში გამოყენებულია 2011 წელს, მისი კულტურის მინისტრობის დროს ჩატარებული კონცერტის კადრები, რომელშიც ელისო ბოლქვაძეც ჩანს.