პარტია “ქართული ოცნების” აღმასრულებელმა მდივანმა ირაკლი კობახიძემ “დღის კურიერის” პირდაპირ ეთერში ხელისუფლების ანტიკრიზისულ გეგმაზე ისაუბრა. მისი თქმით, გეგმის პირველი ნაწილი, რესურსების მობილიზება კარგად სრულდება და გარდა იმისა, რომ შიდა რესურსის მობილიზებით 2 მილიარდი ლარი გამოიყო, საერთაშორისო პარტნიორებთანაც აქტიური მუშაობა მიმდინარეობს.
“მთვრობამ უკვე განაცხადა, რომ მხოლოდ შიდა რესურსებით მობილიზდება 2 მილიარდი ლარი. ასევე, სპეციალური ფონდია შექმნილი, სადაც უკვე ჩარიცხულია მილიონობით ლარი. ამის გარდა, მიმდინარეობს ინტენსიური მუშაობა საერთაშორისო პარტნიორებთან იმისათვის, რომ მოხდეს საკმაოდ დიდი მასშტაბით რესურსების მობილიზება, კრედიტების თუ გრანტების სახით,“- განაცხადა ირაკლი კობახიძემ.
როგორც კობახიძემ აღნიშნა, ანტიკრიზისული გეგმის მეორე ნაწილი, მისი სწორად ხარჯვაა, რაც შესაძლებელი იქნება მხოლოდ მას შემდეგ, რაც რეალური სურათი იარსებებს იმისა, თუ როგორია ეკონომიკური ვითარება და რა სოციალური ეფექტი ჰქონდა ეპიდემიას. მისივე თქმით, ამის განსაზღვრის ერთ-ერთი საშუალება შემოსავლების სამსახურის ბაზაა, რომელიც ყოველი თვის 15 რიცხვში ახლდება.
“მეორე თემაა, როგორ უნდა დაიხარჯოს ეს რესურსები მაქსიმალურად ეფექტიანად. ჩვენ არ გვაქვს იმის ფუფუნება, რომ გადავდგათ არაპრაგმატული ნაბიჯები, თითოეულ თეთრს უნდა გავუფრთხილდეთ. აქედან გამომდინარე, ჩვენ უნდა დაველოდოთ მეტნაკლებად დაზუსტებულ ინფორმაციას იმასთან დაკავშირებით, თუ როგორია ეკონომიკური ვითარება და რა სოციალური ეფექტი ჰქონდა ეპიდემიის გავრცელებას. როგორც კი გვექნება მიახლოებული სურათი მაინც, მაშინ იქნება შესაძლებელი ზუსტი გეგმის წარდგენა,” – განაცხადა ირაკლი კობახიძემ.