სახელმწიფო უსაფრთხოების სამსახურის ის 2019 წლის ანგარიშში აღნიშნულია, რომ ლუგარის ცენტრი წარმოადგენს რა ქვეყნის ბიოლოგიური უსაფრთხოების ერთ-ერთ ძირითად შემადგენელს, აღნიშნული კვლევითი ცენტრი წლების განმავლობაში საინფორმაციო თავდასხმების ერთ-ერთი მთავარი სამიზნეა. შესაბამისად, სუს-ი დეზინფორმაციის კლასიკურ მაგალითად განიხილავს ლუგარის ცენტრის წინააღმდეგ მიმართულ ქმედებებს.
„ცენტრის წინააღმდეგ მიმართულმა კამპანიამ მასშტაბური ხასიათი მიიღო 2019 წლის დასაწყისში, როდესაც ადგილი ჰქონდა ცენტრის საქმიანობასთან ე.წ. ღორის გრიპის (H1N1) სეზონური გავრცელების დაკავშირების მცდელობას.
აღნიშნულ კამპანიას რამდენიმე მიზანი ამოძრავებდა: საქართველოს მოქალაქეებში პროგრესის, მეცნიერული და ტექნოლოგიური განვითარებისადმი შიშის დათესვა; საქართველოს სტრატეგიული პარტნიორის, ამერიკის შეერთებული შტატების წინააღმდეგ მიმართული უარყოფითი განწყობების გაღვივება და ზოგადად, დასავლური სამყაროს „დემონიზება“; საქართველოს ხელისუფლების მიმართ მოსახლეობის ნდობის შემცირება.
კვლევით ცენტრზე მასშტაბური საინფორმაციო თავდასხმები, ისევე, როგორც ვაქცინაციისა და ჯანდაცვის სხვა ეროვნული პროგრამების წინააღმდეგ წარმოებული პროპაგანდა, სხვადასხვა გამოწვევის გარდა, პირდაპირ საფრთხეს უქმნის საქართველოს მოსახლეობის ჯანმრთელობასა და მის უსაფრთხოებას“,- აღნიშნულია სუს-ის 2019 წლის ანგარიშში.