ეკონომიკისა და მდგრადი განვითარების მინისტრმა, ნათია თურნავამ “დღის კურიერის” ეთერში სილამაზის სალონებისა და სპორტდარბაზების ამოქმედების ეტაპზე ისაუბრა. მინისტრის განცხადებით, ასეთი თავშეყრის ადგილებში პირბადის ტარება და ყველა წესების დაცვა მნიშვნელოვანი იქნება იმისთვის, რომ კომპანიებმა აღნიშნული ეტაპის ამოქმედების შემდგომ ფუნქციონირება განაგრძონ.
ნათია თურნავა ფიქრობს, რომ რეკომენდაციების დაცვა კომპანიებისთვის პრობლემას არ უნდა წარმოადგენდეს, პირბადეების წარმოება კი სახელმწიფოს მხარდაჭერით ეპიდემიის პირველივე დღეებში ამოქმედდა.
ეკონომიკის მინისტრმა სილამაზის სალონების სისტემის სენსიტიურობაზე ისაუბრა. მან აღნიშნა, ეს მცირე ბიზნესი ბევრ ადამიანს ასაქმებს და აქედან გამომდინარე, სალონებისთვის მკაცრი გაიდლაინები გაიწერება.
“რაც შეეხება შემდეგ ეტაპებს, ძალიან დიდი იმედი მაქვს, რომ შესაძლებლობა ჩვენ მოგვეცემა თვითონ ეპიდემიის გავრცელების ეფექტური კონტროლიდან გამომდინარე, რომ დროულად განხორციელდეს შემდეგი ეტაპები. ესეც იყო პრემიერ-მინისტრის პრეზენტაციაში.
შემდეგი ეტაპი იქნება 2 კვირაში დაგეგმილი, თუ რაიმე სხვა შემაფერხებელი არ მოხდა და ჩვენ ამას ვაკონტროლებთ ძალიან მკაცრად. ეს იქნება უფრო სამრეწველო დანიშნულების ობიექტები.
ამის შემდეგ უკვე შემდგომი ეტაპების პერიოდში იქნება ისეთი ობიექტები, რომლებიც ითვალისწინებენ უფრო მეტ კონტაქტს ადამიანებს შორის და ეს არის საცალო ვაჭრობა, ოღონდაც არა დისტანციური, როგორსაც დღეს ვხსნით, არამედ უშუალოდ მაღაზიაში მისვლით. ბოლოში იქნება შოპინგმოლები.
საპარიკმახეროები, მესმის, რომ ეს არის ძალიან სენსიტიური, მტკივნეული თემა იმიტომ, რომ სალონების სისტემა, რომელიც არსებობს საქართველოში, არის მცირე ბიზნესი და ძალიან ბევრ ადამიანს ასაქმებს. აქედან გამომდინარე, მათთვისაც მკაცრი გაიდლაინები გაიწერება და მე დარწმუნებული ვარ, რომ ამ გაიდლაინების დაცვით ისინიც შეძლებენ დროულად ამოქმედებას,
– განაცხადა მინისტრმა.
მისივე თქმით, ყოველი მომდევნო ეტაპის გახსნა დამოკიდებულია იმაზე, თუ რამდენად წარმატებით შეასრულებენ სამედიცინო მოთხოვნებს უკვე ამოქმედებული ბიზნესკომპანიები. თურნავა აღნიშნავს, რომ გახნის უფლება ეძლევა არა კონკრეტულ კომპანიებს, არამედ – მთლიან დარგებს. შესაბამისად, იმუშავებს ყველა კომპანია, რომელიც მოთხოვნებსა და რეკომენდაციებს გაითვალისწინებს.
“ისედაც საკმაოდ მძიმედ დააწვა ეს პერიოდი ბიზნესს და ამიტომ ჩემი თხოვნაა კომპანიების მიმართ, მათი დამფუძნებლების მიმართ, მენეჯერების მიმართ, რომ ნუ შევქმნით ამ პრობლემებს და საკუთარ თავსაც მიეცით საშუალება, რომ უსაფრთხოდ გააგრძელოთ ფუნქციონირება,” – განაცხადა ნათია თურნავამ.