თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის დირექტორის ლევან რატიანის განცხადებით, მას, როგორც ექიმს, არანაირი უფლება არ აქვს პაციენტის იდენტიფიცირება მოახდინოს. ასე გამოეხმაურა ლევან რატიანი პირველ საუნივერსიტეტო კლინიკაში მედიკოსების დაინფიცირების შესახებ გავრცელებულ ინფორმაციაზე გუშინ მის მიერ გაკეთებულ კომენტარებს.
მისივე თქმით, ინფიცირების არც ერთი შემთხვევა არ არის დამალული და ყველა მათგანი რამდენიმე სხვადასხვა პორტალზე იტვირთება.
„მე ამ წუთში ვარ კლინიკის ხელმძღვანელი, მაგრამ ვარ მოწოდებით ექიმი და არასდროს არ ვარღვევ ეთიკას. ეთიკა არის ექიმსა და პაციენტს შორის ურთიერთობა. აქედან გამომდინარე, ნებისმიერ პაციენტს, რომელიც არის ინფიცირებული მას უფლება აქვს ილაპარაკოს მისი დაავადების შესახებ, მაგრამ მე, როგორც ექიმს, არანაირი უფლება არ მაქვს პაციენტის იდენტიფიკაციაზე ვისაუბრო. აღნიშნულიდან გამომდინარე, თუ პაციენტებმა გადაწყვიტეს კონტაქტზე გამოსვლა ნებისმიერ საინფორმაციო წყაროსთან, ეს მათი უფლებაა, მაგრამ მე ნუ მომთხოვთ პასუხს, რომ ინფიცირებულის იდენტიფიცირება მოვახდინო. არც ერთი შემთხვევა არ არის დამალული, ასეთი ინფორმაცია იტვირთება რამდენიმე პორტალზე, სადაც მითითებულია და იდენტიფიცირებულია ნებისმიერი პაციენტი, ანუ აღნიშნულიდან გამომდინარე, მე ვიხსნი პასუხისმგებლობას, როგორც მკურნალი ექიმი და პასუხისმგებლობა გადადის ინფორმაციის გაცემაზე ჩემზე მაღლა მდგომ ინსტანციებზე,“- განაცხადა ლევან რატიანმა.
ამასთანავე, მისი თქმით, პირველი საუნივერსიტეტო კლინიკის მედპერსონალი სრულად იცავს ჯანდაცვის მსოფლიო ორგანიზაციის მიერ გაცემულ მითითებებს, თუმცა რატიანის თქმით, ინფიცირებისგან დაზღვეული არავინ არ არის.
„ ჩემი მედპერსონალი ემორჩილება ჯანდაცვის მსოფლიო ორგანიზაციის მიერ მიცემულ რეკომენდაციებს იმის შესახებ თუ როგორ უნდა იყოს აღჭურვილი და რა ეტაპაზე რა უნდა განვახორციელოთ, მაგრამ ერთიც გავითვალისწინოთ, არც ერთი არ ვართ დაზღვეული, არც მე, მათ შორის, რომ არ დავინფიცირდებით, რომ არ დავმძიმდებით, რომ არ გადავალთ რეანიმაციაში და რომ არ დამთავრდება ჩვენი სიცოცხლე ბიოლოგიური სიკვდილით. ამ პასუხისმგებლობას ვიღებთ, რომ ვემსახუროთ ქვეყანას. ძალიან გთხოვთ გვაცალეთ მუშაობა! ჩვენ თქვენ გემსახურებით!“- განაცხადა ლევან რატიანმა.