შინაგან საქმეთა მინისტრის პირველმა მოადგილემ, კახაბერ საბანაძემ ტელეკომპანია “იმედის” პირდაპირ ეთერში საუბრისას ყურადღება გაამახვილა ქვეყანაში დანაშაულის სტატისტიკის კლებაზე.
როგორც მან აღნიშნა, მნიშვნელოვნადაა შემცირებული სიცოცხლისა და ჯანმრთელობის წინააღმდეგ მიმართული დანაშაულები, ასევე, ქონების, საკუთრების წინააღმდეგ მიმართული დანაშაულის ფაქტები.
„მე მინდა, შევეხო რამდენიმე საკითხს, მათ შორის, დანაშაულის სტატისტიკას, რომელიც სულ რამდენიმე დღის წინ გამოქვეყნდა და მინდა გითხრათ, რომ შეინიშნება აშკარა კლება მსგავს პერიოდთან მიმართებით, წინა წელს ვგულისხმობ. განსაკუთრებით მნიშვნელოვანია და მინდა, შევეხო ისეთი კატეგორიის დანაშაულს, როგორიც არის სიცოცხლისა და ჯანმრთელობის წინააღმდეგ მიმართული ქმედებები და დანაშაულები, ასევე, ქონების, საკუთრების წინააღმდეგ მიმართული დანაშაული. აღნიშნული მიმართულებით და, ზოგადად, კლებაა, აშკარაა. დაახლოებით, წინა მსგავს პერიოდთან მიმართებით არის 10%-იანი კლება და, რა თქმა უნდა, ასე ჩაშლილად შეიძლება, ყველა დანაშაულსა და ყველა კატეგორიაზე ვისაუბროთ, თუმცა აქ ხაზია ცალსახად გასასმელი, რომ სიცოცხლისა და ჯანმრთელობის დანაშაულის მიმართულებით შეიძლება აშკარა კლება, თუმცა არის გარკვეული კატეგორიები, სადაც გაზრდილია დანაშაულის მაჩვენებელი – ეს არის კიბერდანაშაული. სტატისტიკა ამ კუთხით გაზრდილია. კიბერდანაშაული, ზოგადად, მოგეხსენებათ, რომ ეს არის გლობალური გამოწვევა. ჩვენ ამ მიმართულებით ვთანამშრომლობთ ჩვენს პარტნიორებთან საკმაოდ აქტიურად, ასევე, ხდება საგამოძიებო მიმართულების გადამზადება იმისთვის, რომ ეფექტური იყოს საგამოძიებო და ოპერატიული დანაყოფი დანაშაულის პროფილაქტიკის, პრევენციისა და გამოძიების პროცესში“, – განაცხადა კახაბერ საბანაძემ.