ტურიზმის სექტორის მხარდაჭერის მესამე ეტაპი გამორჩეულია იმით, რომ არის სრულიად სპეციფიკური, გამიზნული მხოლოდ ტურიზმის ინდუსტრიისთვის და აგებულია მათ საჭიროებებზე, – ამის შესახებ ეკონომიკოსა და მდგრადი განვითარების მინისტრმა, ნათია თურნავამ განაცხადა.
მისი თქმით, აღნიშნული გეგმა კომპლექსურია, რადგან კონკრეტულ გადაწყვეტილებებს მოიცავს ტურიზმში მოქმედი თითოეული კომპანიის ქვედარგისთვის, ვინაიდან მათ განსხვავებული სპეციფიკა აქვთ.
„თუმცა, ვიტყვი, რომ საერთო გადაწყვეტილება იყო მიღებული მთლიანად ტურისტულ ინდუსტრიაში მოქმედ ბიზნესებზე, რაზეც უკვე პრემიერმა ისაუბრა – 2020 წლის ქონების გადასახადისგან სრული გათავისუფლება, რაც ძალიან მნიშვნელოვანია და გამოუთავისუფლებთ კომპანიებს საბრუნავ საშუალებებს, რათა შეინარჩუნონ დასაქმებულები და გადაიხადონ ხელფასები, ასევე სხვადასხვა მიმდინარე ხარჯები და მოემზადონ ამოქმედებისთვის; ასევე საშემოსავლო გადასახადი, რომელიც აქამდე იყო პირველ ნოემბრამდე გადავადებული, გაგრძელდება წლის ბოლომდე და აქაც იგივე პრობლემას ვპასუხობთ, რა პრობლემაც შეექმნა უმეტეს ბიზნეს, მათ შორის ამ ინდუსტრიას – საბრუნავი საშუალებების დეფიციტი“, – განაცხადა ნათია თურნავამ.
მისი თქმით, რაც შეეხება კონკრეტულ ქვედარგს, განთავსების ობიექტებს იწყება უპრეცედენტო პროგრამა.
„უპრეცედენტო პროგრამას ვიწყებთ, რომლითაც ვთავაზობთ ყველა სასტუმროს, რომლის წლიურ ბრუნვაც 20 მილიონ ლარამდე იყო და ეს არის უდიდესი უმრავლესობა, პრაქტიკულად 95 პროცენტზე მეტი სასტუმრო ინდუსტრიის ობიექტი – ჩვენ აქაც მოვახდენთ მათი საბანკო სესხის 80 პროცენტის სუბსიდირებას სესხის პირველ 5 მილიონ ლარზე. ეს პროგრამა გაგრძელდება ექვსი თვე“, – აღნიშნა მინისტრმა.
ამასთან, მისი თქმით, ასევე სახელმწიფო დაეხმარება და დაასუბსიდირებს ტურისტულ გამოფენებში მონაწილეობას, რაც მალე გახდება აქტუალური და დაეხმარება ტურისტულ ობიექტებს, საქართველოს ახალი ტურისტული იმიჯი გაიტანონ მსოფლიო ბაზარზე.
„როგორც უკვე ითქვა, ჯანდაცვის სამინისტროსთან ერთად, დავეხმარებით სექტორს მსოფლიო ტურისტული ორგანიზაციის უსაფრთხოების სტანდარტების დანერგვაში, რაშიც ერთი ნაბიჯით ვუსწრებთ ბევრ სხვა ქვეყანას“, – განაცხადა ნათია თურნავამ.