გვეყოლება ახალი ოპოზიციაც, რომლის დაბადების პროცესსაც ახლა ვუყურებთ, ამ ბოლო თვეების განმავლობაში, – ამის შესახებ პარლამენტის თავმჯდომარემ „იმედის“ გადაცემაში „არენა“ განაცხადა. არჩილ თალაკვაძის თქმით, „ნაციონალური მოძრაობა“ და „ევროპული საქართველო“, საკონსტიტუციო ცვლილებებთან დაკავშირებულ კენჭისყრაში მონაწილეობაზე უარის თქმით, ქვეყნის მომავალს უღალატეს.
„ეს ორი პარტია, ძველი ოპოზიცია, ამ ტვირთს ვერ მოიშორებს, რომ მათ ისტორიულ მომენტში უღალატეს საქართველოს ინტერესებს, უღალატეს საზოგადოებას, საკუთარ პირობას და უღალატეს მომავალს და მომავლის პოლიტიკას“, – განაცხადა თალაკვაძემ.
მისი თქმით, „ნაციონალურ მოძრაობაში“ ესმით, რომ პარტიის მიმართ ნდობა დაბალია და ამომრჩეველი მათ ქვეყნის მომავალს არ ანდობს, ამიტომ მათი დღის წესრიგი სწორედ დესტრუქციული ქმედებებია. 29 ივნისის კენჭისყრამ კი ეს საზოგადოებას კიდევ ერთხელ დაანახა.
„ამ კენჭისყრით სინამდვილეში მათი გეგმა და მათი სურვილი კი არ შესრულდა, რომ საქართველოს დემოკრატია გაძლიერდეს. რეალურად ამ გადაწყვეტილებამ კიდევ ერთხელ გააკეთა ლუსტრაცია თუ ვინ არის ეს ხალხი და რა პოლიტიკურ ძალასთან გვაქვს საქმე. ზუსტად ეს იყო წამოცდენა ნიკა გვარამიას მხრიდან, როდესაც მან თქვა სიტყვა „დამხობა“ და შემდეგ გამოვიდა ბატონი გოცირიძე და თქვა დამხობა კეთილი გაგებითო“, – განმარტა პარლამენტის თავმჯდომარემ.