სპორტისა და ახალგაზრდობის საქმეთა სამინისტროში, მინისტრმა ტარიელ ხეჩიკაშვილმა და სლოვაკური კომპანია Autokomodex Trnava spol.sro-ს ხელმძღვანელებმა, დირექტორმა პეტერ ფილამ და გენერალურმა დირექტორმა ვლადიმერ კლეპანეცმა ოფიციალურ ხელშეკრულებას მოაწერეს ხელი.
ხელშეკრულების თანახმად, სლოვაკური კომპანია თბილისში, რუსთავსა და ქუთაისში 20 საფეხბურთო და სარაგბო სტადიონის მშენებლობას იწყებს.
სპორტის სამინისტროს ინფორმაციით, ხელშეკრულების საერთო ღირებულება 9. 410. 000 ევროა. სამშენებლო სამუშაოები 2016 წლის ბოლოს დაიწყება და 2017 წლის მაისში დასრულდება. პროექტის თანახმად თბილისში, ქუთაისსა და რუსთავში თანამედროვე სტანდარტების 10 საფეხბურთო და 10 სარაგბო სტადიონი აშენდება.
“იმ მნიშვნელოვანი საერთაშორისო ტურნირებიდან გამომდინარე, რომლებსაც საქართველო 2017 წელს მასპინძლობს, სახელმწიფო იღებს ვალდებულებას, რომ აღნიშნულ ტურნირებს, მათ შორის მსოფლიოს ახალგაზრდულ ჩემპიონატს რაგბიში და ევროპის 19-წლამდელთა ჩემპიონატს ფეხბურთში უმაღლეს დონეზე უმასპინძლოს და თანამედროვე ინფრასტრუქტურა მოაწყოს. გაფორმდა ხელშეკრულება სამინისტროსა და აღნიშნულ სლოვაკურ კომპანიას შორის. ამ უმნიშვნელოვანესი გადაწყვეტილების შედეგად, იწყება 20 საფეხბურთო და სარაგბო მოედნის მშენებლობა, რაც ხელს შეუწყობს როგორც ფეხბურთის, ასევე რაგბის განვითარებას საქართველოში. ახალი სტადიონებისათვის ადგილები უკვე შერჩეულია. ასევე აღსანიშნავია, რომ სლოვაკურ კომპანიას სურვილი აქვს, ამ პროქტის წარმატებულად განხორციელების შემთხვევაში, გაგრძელდეს საქართველოსთან თანამშრომლობა უკვე კერძო კლუბებთან და თვითმმართველობებთან სხვადასხვა რეგიონებში . მსურს სპორტის ყველა გულშემატკივარს მივულოცო ამ მართლაც უმნიშვნელოვანესი პროექტის დაწყება“,-აღნიშნა ტარიელ ხეჩიკაშვილმა.
Autokomodex Trnava spol.sro-ს დრიექტორის, პეტერ ფილას თქმით კი, მოხარულია, საქართველოსთან და კერძოდ სპორტისა და ახალგაზრდობის საქმეთა სამინისტროსთან თანამშრომლობს.
“დიდი ხანია, ქართულ მხარესთან შეხვედრებს ვმართავთ, ყოველთვის გვსურდა, მნიშვნელოვანი და ერთობლივი პროექტების განხორციელების საშუალება გვქონოდა. ჩვენთვის სასიხარულოა, rom საფეხბურთო და სარაგბო სტადიონების მშენებლობას ვიწყებთ. მეც თავად ყოფილი სპორტსმენი ვარ და ამ მხრივაც ძალიან საინტერესოა ჩემთვის საქართველოსთან თანამშრომლობა. შეგვიძლია განვაცხადოთ, რომ სტადიონების მშენებლობის საკმაოდ დიდი გამოცდილება დაგვიგროვდა, ახლა კი მაქსიმალურად ვცდილობთ, ეს გამოცდილება თქვენც გაგიზიაროთ და საქართველოში სპორტის სამომავლო განვითარებას შევუწყოთ ხელი”,-აღნიშნა პეტერ ფილამ.