თამარ ბაჩალიაშვილის მამა, ჯუმბერ ბაჩალიაშვილი ამბობს, რომ სამხარაულის ექსპერტიზის ბიუროში მის ახლობლებს, რომელებიც იქ იყვნენ მისული, უთხრეს, რომ მისი შვილის ცხედარს ამ საღამოს ვერ გაატანდნენ, რადგან ყინული არ ჰქონდათ.
“ძალიან ისეთ მდგომარეობაშია, რომ ვერ იმას ვიზამთო… თან კიდევ ყინული არ აქვთ. ამიტომაც შევფერხდით. არ ვიცი
ჩემთვის არ უთქვამთ. ვინც იყვნენ იმათ მე მითხრეს, არ აქვთ ყინული. ჩემს ბიძაშვილი უთხრეს ასე. ამჟამად არ გვაქვსო. ჩვენ ვიშოვეთ ყინული” – განაცხადა ჯუმბერ ბაჩალიაშვილმა “ღამის მთავარში”.
მამა ამბობს, რომ გამომძიებლებმა სახლიდან მისი შვილის კომპიუტერი წაიღეს. თუმცა, ამ დრომდე არ იცის შეძლეს თუ არა გამომძიებლებმა მისი შვილის კომპიუტერში შეღწევა.
“მე არ გავჩერდები სანამ ბოლომდე არ მივა ეს საქმე. გამოძება უნდა დაიწყო სამსახურიდან სადაც მუშაობდა და ბევრ რაღაცეებს მერე დავამატებ.
კომპიუტერის გარდა არაფერი წაუღიათ. ჯერ გვიან გახსნეს, სამი დღე აქეთ იქით დავდიოდით. მერე კიდე, ერთი იძახის გახსნილია, მეორე იძახის -არა ჯერ ვერ გავხსენით.
წელავდნენ, გუშინ, სანამ აქცია არ გაიმართა და არ დაინახეს ხალხის აგრესია, ალბათ არც გამოჩნდებოდნენ, მე ასე ვფიქრობ.
დღემდე არავის მოუწოდებია გაიხსნა თუ არა კომპიუტერი… თუ არ გაიხსნა რატო მეუბნება, აი, ნახე თქვენი ბავშვი რამხელა პრობლემის წინაშე ყოფილაო.
თვითმკვლელები ვერსია არა! ოჯახის მხრიდან არანაირი პრობლემა რ ქონია. ხანდახან რომ მოდიოდა აღელვებული, ეს მოდიოდა სამსახურის მხრიდან, როცა სამსახურში წავიდოდა სპეციალურად ველოდებოდი, კიდევ ასე მოვა ბავშვი?
ეს ხდებოდა სანამ პანდემია შემოვიდოდა. იმის შედეგ კიდევ 2-ჯერ სახლიდან მუშაობდა და მაშინაც შევატყვე.
დაჯდებოდა ამ კომპიუტერთან, და აღელდებოდა, ვეუბნებოდი, შვილო რა მოხდა, არ მეუბნებოდა არაფერს, არ მანახებდა სამსახურს, რატომ არ ვიცი, აზრზე ვერ მოვდივარ დღემდე.
ამაში ძალიან დიდი რაღაცაა დამარხული და სანამ ამას არ გავარკვევ, ვერ მოვისვენებ” – განაცხადა ჯუმბერ ბაჩალიაშვილმა.
თამარ ბაჩალიაშვილის მამის განცხადებასთან დაკავშირებით “აიპრესი” ექსპერტიზის ბიუროს დაუკავშიდა, სადაც განგვიცხადეს:
“სსიპ ლევან სამხარაულის სახელობის სასამართლო ექსპერტიზის ბიურო უპირველეს ყოვლისა გამოვთქვამთ მწუხარებას თამარ ბაჩალიაშვილის გარდაცვალების გამო და ვუსამძიმრებთ ოჯახს.
ექსპერტიზის ეროვნული ბიურო განმარტავს, რომ ბიუროს სამედიცინო ექსპერტიზის დეპარტამენტში ამ დრომდე მიმდინარეობდა გვამის სასამართლო-სამედიცინო ექსპერტიზა და ამჟამად დასრულებულია. ექსპერტიზა ჩაატარა ექსპერტიზის ეროვნული ბიუროს ექსპერტებმა და ესწრებოდა ოჯახის მიერ წარდგენილი პირი. ამ მომენტისთვის ბიურო მზად არის ოჯახს გადასცეს გარდაცვლილის ცხედარი.
სიმართლეს არ შეესაბამება გავრცელებული ინფორმაცია, რომ თითქოს ბიუროს გარდაცვლილის ახლობლებმა მოთხოვეს ყინული და მათ ბიუროს მხრიდან ეთქვათ უარი. ასეთი შინაარსის კომუნიკაცია ბიუროს ექსპერტებსა და ოჯახის წარმომადგენლებს შორის არ შემდგარა.
აქვე განვმარტავთ, რომ ექსპერტიზის ეროვნული ბიუროს სამედიცინო ექსპერტიზის დეპარტამენტს აქვს სპეციალური, შესაბამისი დანადგარები, რომელშიც ხდება გვამის განთავსება იმ დრომდე, ვიდრე ოჯახის წევრების მიერ არ მიიღება გადაწყვეტილება გარდაცვლილის გადასვენების შესახებ. აღნიშნული პროცედურა არაერთხელ განხორციელებულა ბიუროში. ამ შემთხვევაშიც, რა თქმა უნდა ბიურო მზად არის განათავსოს გარდაცვლილის ცხედარი სპეციალურ სივრცეში, ოჯახის მხრიდან გადასვენების მზაობის გამოთქმამდე.
ბიურო არის საექსპერტო დაწესებულება და არც ამ და არც სხვა შემთხვევაში, საექსპერტო დაწესებულებას არ გამოუყენებია ყინული ან, სხვა რაიმე სახის ე.წ. სარიტუალო აღჭურვილობა.
ბიურო მზად არის, იმოქმედოს ოჯახის მოთხოვნის შესაბამისად და მათ მიერ დასახელებულ ნებისმიერ დროს მოხდეს გვამის გადასვენება” – განუცხადეს “აიპრესს” ექსპერტიზის ბიუროში.
შეგახსენებთ, 5 დღიანი ძებნის შემდეგ, 23 წლის თამარ ბაჩალიაშვილი, რომელიც კომპანია „ზეგ“ -ის ყოფილი თანამშრომელია, თეთრი წყაროს მუნიციპალიტეტის ტყეში საკუთარ ავტომანქანის უკანა სავარძელში მწოლიარე მდგომარეობაში გარდაცვლილი მწყემსმა იპოვა.