საქართველოს კალათბურთელთა ეროვნულმა ნაკრებმა ევრო ბასკეტ 2017-ზე გამოსვლის უფლება, F ჯგუფში დაკავებული პირველი ადგილით მოიპოვა.
ჩვენმა გუნდმა კონტინენტის პირველობის შესარჩევი ციკლის ბოლო შეხვედრა, სტუმრად მონტენეგროსთან გამართა და ჯგუფის მანამდელი ლიდერი ანგარიშით 90:84 დაამარცხა. ამ გამარჯვებით ჩვენმა ნაკრებმა პირველ წრეში, მეტოქესთან თბილისში წაგების გამო სრულფასოვანი რევანში აიღო. ქალაქ ბარიში, “სპორტ ჰოლ ტოპოლიცაში” შეხვედრა ქართველმა კალათბურთელებმა უკეთესად დაიწყეს და პირველი მეოთხედი 8-ქულიანი უპირატესობით, ანგარიშით 26:18 მოიგეს. მეორე მეოთხედში მასპინძლებმა სხვაობა 4 ქულამდე შეამცირეს და დიდ შესვენებაზე ანგარიში 45:41 იყო, საქართველოს ნაკრების სასარგებლოდ. მესამე მეოთხედი საქართველოს ნაკრებმა 19:21 წააგო და ბოლო მეოთხედის წინ ანგარიში 60:62 გახდა, ჩვენს სასარგებლოდ.
ბოლო მეოთხედის სტარტზე საქართველოს ნაკრებმა მცირე უპირატესობა მოიპოვა, მაგრამ შემდეგ მასპინძლებმა ჯერ გათანაბრება, თამაშის დასრულებამდე 2 წუთით ადრე კი ანგარიშში 5 ქულით დაწინაურებაც მოახერხეს. თუმცა, ჯერ დიქსონმა, შემდეგ ვიქტორ სანიკიძემ ზედიზედ ზუსტი 3-საქმულიანებით წინ ისევ საქართველოს ნაკრები გაიყვანეს, ზაზა ფაჩულიამ კი ორი ზუსტი საჯარიმოთი ჩვენი უპირატესობა 3 ქულამდე გაზარდა. დარჩენილ წამებში ჩვენმა გუნდმა დაცვაში უშეცდომოდ ითამაშა, შეტევაში კი კიდევ რამდენიმე ქულის რეალიზება მოახერხა და საბოლოოდ 6 ქულით ანგარიშით 90:84 იმარჯვა.
ამრიგად საქართველოს საკალათბურთო ნაკრები, ევროპის ჩემპიონატზე ზედიზედ მეოთხედ იასპარეზებს.