პარიზის მახლობლად მდებარე სოფელი ლევილი 23 სექტემბერს საქართველოს ნაწილი გახდება

დიასპორის საკითხებში სახელმწიფო მინისტრი გელა დუმბაძე საფრანგეთის რესპუბლიკაში მიემგზავრება, სადაც 23 სექტემბერს ლევილის მამულის საქართველოსთვის გადმოცემის აქტს მოაწერს ხელს, რითაც 25-წლიანი ისტორიული პროცესი დასრულდება და მამული მის კანონიერ მემკვიდრეს, ქართველ ხალხს დაუბრუნდება.
 25- წლიანი პროცესის საბოლოო აქტს საქართველოს მთავრობის მხრიდან დიასპორის საკითხებში სახელმწიფო მინისტრი – გელა დუმბაძე, ხოლო ფრანგული მხარიდან საქართველოს დემოკრატიული რესპუბლიკის მთავრობის წევრთა ოჯახების წარმომადგენლები მოაწერენ ხელს.
ლევილის მამულის საქართველოსთვის გადმოცემის ცერემონიას საქართველოს იუსტიციის მინისტრი – თეა წულუკიანი, საქართველოს საგანგებო და სრულუფლებიანი ელჩი საფრანგეთის რესპუბლიკაში – ეკატერინე სირაძე-დელონე, საქართველოს საგანგებო და სრულუფლებიანი დესპანი საფრანგეთში – გოჩა ჯავახიშვილი, ქალაქ ლევილის მერიისა და ქართული დიასპორის წარმომადგენლები დაესწრებიან.