„ნაცმოძრაობამ“ და ბოკერიამ სასაცილო ტყუილები გამოაცხვეს, ვითომ, რუსეთი გვაძლევს ფულს, ამის მიზეზი რეიტინგია, გულზე სკდებიან, ამიტომ ილაპარაკონ, – ასე ეხმაურება „პატრიოტთა ალიანსის“ ერთ-ერთი ლიდერი დავით თარხან-მოურავი ოპონენტთა განცხადებებს „პატრიოტთა ალიანსის“ დაფინანსებასთან დაკავშირებით.
მისი თქმით, არანაირი მოკვლევა აღნიშნულ საკითხზე არ დაწყებულა და არც რამე დანაშაულია ჩადენილი.
„არანაირი მოკვლევა არ დაწყებულა. რამე დანაშაულია ჩადენილი? მგონი, არაფერი. საკმარისი არ არის დაგვაფინასოს, მაგალითად ინჯიამ? არ შეუძლია ხუთი პარტიის დაფინანსება? საკმარისი არ არის მისი დაფინანსება? მაგალითი მოვიყვანე უბრალოდ. „ნაცმოძრაობა“ და ბოკერია ცდილობენ რაღაცას. სასაცილო ტყუილები გამოაცხვეს, ვითომ, რუსეთი გვაძლევს ფულს. ყველაფერი საჯაროა. რამე დანაშაული ჩავიდინეთ? ეს უნდა ვკითხოთ „ნაცმოძრაობას“, რომელიც მარტო მოსყიდვით ცხოვრობს. „დოსიე“ არ არის არც საინფორმაციო გამოცემა და არც ანალიტიკური, უყურეთ ჩვენს მასალებს. ეს არის ყალბი სააგენტო, რომელსაც უწერია, რომ არანაირ ინფორმაციაზე პასუხს არ აგებს. „დოსიეზე“ წერია, რომ ჩვენ აგვისტოში ცარიელი პარლამენტის პიკეტირება უნდა მოვაწყოთ, სადაც არავინ არის, ამას ჭკუათმყოფელი კაცი დაწერს? თანაც აჭარლები უნდა ჩამოვიყვანოთ. სადმე რამე ხარჯი ნახეთ? ჩვეულებრივი ლაყბობაა ეს ყველაფერი. ერთადერთი მიზეზი, რატომაც ეს ხდება არის ის, რომ „ნაცმოძრაობა“ არის მეხუთე ადგილზე და ჩვენ ვართ პირველზე. გვიპასუხონ, თვითონ საიდან ფინანსდებიან. შურთ, ხალხს ვერ აგროვებენ, მიტინგს ვერ აწყობენ, გულზე სკდებიან, სხვა გამოსავალი არ აქვთ. ამიტომ, კარგია, ილაპარაკონ. რაც მეტს ილაპარაკებენ, მეტ სისულელეს, კრეტინობას იტყვიან და უფრო კარგ პასუხს გავცემთ“, – განაცხადა დავით თარხან-მოურავმა.