თამარ ბაჩალიაშვილის საქმეზე საგამოძიებო მოქმედებები გრძელდება. დღეს ექსპერტიზის ეროვნულ ბიუროში შეისწავლიან ნივთებს, რომელიც გარდაცვლილი ახალგაზრდას ავტომობილიდან მტკიცებულებების სახით ამოიღეს. მათ შორის საუბარია მეხსიერების ბარათზეც. საპროცესო მოქმედებას დაესწრება დაზარალებული ოჯახის ადვოკატიც:
“ავტომობილში აღმოჩენილია, ჯერჯერობით, გაურკვეველი “ფლეშკა”, არა ის “ფლეშკა”, რომელიც თამარს ჰქონდა გასაღებებზე და რომელსაც ცნობენ და ვეძებთ დღემდე. ალბათ უფრო მუსიკალური იქნება. გარდა ამისა, ოჯახიდან წაღებულია გარკვეული ტექნიკა, WI-Fi-სთან დაკავშირებული როუტერის აპარატურა და ბევრი ისეთი ნივთი, რომელზეც ჩემი თანდასწრების გარეშე ექსპერტიზა არ ხდება,”- განაცხადა მიხეილ რამიშვილმა.
23 წლის თამარ ბაჩალიაშვილი 18 ივლისს დაიკარგა. 22 ივლისს მისი ცხედარი 4-დღიანი ძებნის შემდეგ თეთრიწყაროს მუნიციპალიტეტში, სოფელ მაწევანის ტერიტორიაზე ნახეს. საქმეზე გამოძიება 115-ე და 143-ე მუხლებით მიმდინარეობს, რაც თვითმკვლელობამდე მიყვანასა და თავისუფლების უკანონო აღკვეთას ითვალისწინებს.