„ქართული ოცნების“ ხელისუფლების ძალისხმევით შეუქცევადად იზრდება როგორც თვითმმართველი ქალაქების დამოუკიდებლობის ხარისხი, ასევე მათი ბიუჯეტი, მჯერა, თქვენი მხარდაჭერის შემთხვევაში შევძლებთ კასპი ბევრად უფრო განვითარებულ, ეკოლოგიურად სუფთა, წარმატებულ ქალაქად ვაქციოთ“, – ამის შესახებ კასპის მერობის კანდიდატმა ვახტანგ მაისურაძემ მისი კანდიდატურის წარდგენისას განაცხადა.
„დიდი მადლობა მინდა გადავუხადო „ქართულ ოცნებას“, რომელმაც კასპის მუნიციპალიტეტის მერობის კანდიდატად დამასახელა, ეს ჩემთვის დიდი პატივია.
დარწმუნებული ვარ, გჯერათ, რომ კასპში დაბადებული კაცისთვის თავისი თანაქალაქელის მსახურება დიდი პასუხისმგებლობაა. წლების განმავლობაში, სხვადასხვა თანამდებობაზე მუშაობის დროს, არასდროს გამიწყვეტია კავშირი ჩემს მშობლიურ რაიონთან.
განსაკუთრებით მაშინ, როდესაც შიდა ქართლში სახელმწიფო რწმუნებულის აპარატში ვმუშაობდი, თუ კასპის მუნიციპალიტეტის გამგებლობის დროს.
შესაბამისად, კარგად ვიცი ჩვენი რაიონის, ჩვენი მოსახლეობის წინაშე არსებული გამოწვევები და საჭიროებები. ამ ყველაფრის ფონზე და იმის გათვალისწინებით, რომ „ქართული ოცნების“ ხელისუფლების ძალისხმევით შეუქცევადად იზრდება როგორც თვითმმართველი ქალაქების დამოუკიდებლობის ხარისხი, ასევე მათი ბიუჯეტი, მჯერა, თქვენი მხარდაჭერის შემთხვევაში შევძლებთ კასპი ბევრად უფრო განვითარებულ, ეკოლოგიურად სუფთა, წარმატებულ ქალაქად ვაქციოთ, სადაც ინფრასტრუქტურულ, ეკონომიკურ და სოციალურ პროექტებთან ერთად დიდი მნიშვნელობა მიენიჭება ეკოლოგიას, ტურიზმის განვითარებას, განათლებას, კულტურას, სპორტს.
მინდა გჯეროდეთ, როგორც ჩვენი რაიონი, ისე თითოეული ადგილობრივი მოსახლე ძალიან ძვირფასია ჩემთვის და მუდამ თქვენს გვერდით ვიქნები ნებისმიერი გამოწვევის თუ სირთულის დაძლევის დროს.
რა თქმა უნდა, ერთად ვიდგებით მაშინაც, როდესაც ჩვენი ქალაქისთვის, ჩვენი რაიონისთვის, ჩვენი შვილებისა და ჩვენი მომავალი თაობისთვის ბევრ სასიკეთო პროექტს განვახორციელებთ.
კიდევ ერთხელ მადლობას მოგახსენებთ მობრძანებისთვის. მჯერა, ერთად აუცილებლად გავიმარჯვებთ“, –აღნიშნა ვახტანგ მაისურაძემ.