ბოლნისში „ნაციონალური მოძრაობისა“ და „ქართული ოცნების“ აქტივისტებს შორის მომხდარ დაპირისპირებასთან დაკავშირებით შინაგან საქმეთა სამინისტრომ გამოძიება სისხლის სამართლის კოდექსის 187-ე და 236-ე მუხლებით დაიწყო, რაც ნივთის დაზიანებას ან განადგურებას და ცეცხლსასროლი იარაღის (გარდა სანადირო გლუვლულიანი ცეცხლსასროლი იარაღისა (თოფისა), საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენას, შენახვას, ტარებას, დამზადებას, გადაზიდვას, გადაგზავნას ან გასაღებას გულისხმობს.
როგორც მომხდართან დაკავშირებით „ნაციონალური მოძრაობის“ ახალგაზრდული ფრთის ხელმძღვანელი აცხადებს, მათ სოფელ მუხრანასთან მანქანით გზა „ქართული ოცნების“ მხარდამჭერებმა გადაუჭრეს. მისივე მტკიცებით, იყო ცეცხლსასროლი იარაღიდან რამდენიმე გასროლაც.
მომხდარზე საუბრობს მაჟორიტარობის კანდიდატი კახა ოქრიაშვილიც.
„აქ არის ცემა-ტყეპა. აქ არ არის თავისუფალი არჩევნები. ქვემო ქართლში არ არსებობს, რომ ეს არჩევნები იყოს აღიარებული ლეგიტიმურად. წარმოიდგინეთ, რა ხდება“, – განაცხადა ოქრიაშვილმა.
თავის მხრივ, ბრალდებებს პასუხობს „ქართული ოცნების“ მაჟორიტარობის კანდიდატი გოგი მეშველიანი, რომელიც აცხადებს, რომ აღნიშნული ფაქტის შესახებ ინფორმაცია არ აქვს.
„ფაქტთან დაკავშირებით მე არანაირი ინფორმაცია არ მაქვს. იმედი მაქვს, რომ ამ შეტყობინების შემდეგ სამართალდამცავები დეტალურად შეისწავლიან ფაქტს. იქნება შესაბამისი რეაგირება. რაც შეეხება ჯავშანიანში განხორციელებულ აგრესიულ ქმედებას, ამ ქმედებაში უშუალოდ მონაწილეობდა ჩემი ოპონენტი ოქრიაშვილი, რომელიც რამდენიმე ათეულ მხარდამჭერთან ერთად მივარდა ჩვენს სპეციალისტს სოფელში. 65 წლის მამაკაცს ქუჩაში მოუწყო გარჩევა, დაემუქრა პატიმრობით და ფიზიკური ანგარიშსწორებით, თუ ეს ადამიანი არ შეწყვეტდა „ოცნების“ მხარდაჭერას და მიაყენა მას შეურაცხყოფა. ალბათ, არჩევნების მოახლოებასთან ერთად კიდევ ბევრ განცხადებას მოვისმენთ. ეს ადამიანები აცნობიერებენ რომ არანაირი გამარჯვების შანსი არა აქვთ, შესაბამისად მსგავსი პროვოკაციებით ცდილობენ, არჩევნებს მიაყენონ ჩრდილი“, – განაცხადა მეშველიანმა.