წუხელ ტელეკომპანია “იბერია”-ში სამართალდამცველები მივიდნენ

გუშინ, “იბერიას” პირდაპირ ეთერში მომხდარი ინციდენტის შემდეგ ტელეკომპანიის ოფისში სამართალდამცველები მივიდნენ. ადგილზე ძველი თბილისის პოლიციის თანამშრომლები იყვნენ  მობილიზებული.
შსს-ში აცხადებენ, რომ ამ ეტაპზე მომხდართან დაკავშირებით საქმე აღძრული არ არის.
ტელეკომპანია „იბერიას“ პირდაპირ ეთერში ფიზიკური დაპირისპირება დღეს საღამოს მოხდა. ერთმანეთს ბლოკი “თოფაძე მრეწველები ჩვენი სამშობლო”-ს ჩუღურეთის რაიონის მაჟორიტარობის კანდიდატი ზაზა აგლაძე და პარტია „რეფორმატორების“ ლიდერი ირაკლი ღლონტი დაუპირისპირდნენ.
აგლაძის გაღიზიანება ღლონტის მხრიდან გოგი თოფაძის მისამართით გამოთქმულმა განცხადებამ გამოიწვია. „გოგი თოფაძის პოზიციები არის რუსულ წისქვილზე წყლის დამსხმელი“, – განაცხადა ირაკლი ღლონტმა. სწორედ ამ სიტყვების დასრულების შემდეგ ესროლა წყლით სავსე ჭიქა ზაზა აგლაძემ ირაკლი ღლონტს, რაც პირდაპირ ეთერში ხელჩართულ ჩხუბში გადაიზარდა.