კორონავირუსით გარდაცვლილი 32 წლის თათია ხურციძე, ქუთაისის სასტუმრო CASA CALDA-ს დამფუძნებელი იყო.
მის შესახებ სოციალურ ქსელში ბევრი წერს. თათიას შესახებ ინფორმაცია გაეროს ქალთა ორგანიზაციის ფონდის ოფიციალურ გვერდზეც გვხვდება. ის მკითხველს საკუთარ ისტორიას თავად უზაირებდა. პოსტი სოციალურ ქსელში ორი კვირის წინ, 10 ოქტომბერს გამოქვეყნდა.
როგორც წერდა, არ აკმაყოფილებდა ის, რაც ჰქონდა და უნდოდა უფრო მეტი გაეკეთებინა მომავალში. მას ბევრი გეგმა და დაუსრულებელი პროექტი დარჩა. ჰყავს მეუღლე და ორი შვილი.
„15 წლიდან ვმუშაობ, თუმცა ყოველთვის სამოქალაქო სექტორში ვსაქმიანობდი და არასდროს წარმომედგინა, საკუთარი ბიზნესი მქონოდა.
ბოლო წლებში ჩემი ქალაქი ტურისტულად განსაკუთრებით მიმზიდველ ადგილად იქცა. ქუთაისის ირგვლივ უამრავი ღირსშესანიშნაობაა, აეროპორტმა კი მისი პოპულარობა კიდევ უფრო გაზარდა.
ამ გარემოებებმა საკუთარი სასტუმროს გახსნაზე დამაფიქრა. მქონდა სახლი, რომელიც იდეის რეალიზების შესაძლებლობას მაძლევდა, თუმცა ბევრს ვყოყმანობდი. არ ვიცოდი, ღირდა თუ არა დაწყება, რამდენად გაამართლებდა ის, ან ბიზნესს თავს როგორ გავართმევდი, მაგრამ ბოლოს მაინც გადავწყვიტე, ჩანაფიქრი რეალობად მექცია.
ჩემს ცხოვრებას ახლა სულ სხვა მუხტი აქვს. ვხვდები, რომ ამ გადაწყვეტილებით დიდი ნაბიჯი გადავდგი:
ვმართავ ბიზნესს, რომელიც მომგებიანია. ტურისტები რეკლამის გარეშე მოდიან ჩემთან და ვფიქრობ, ეს დიდი კონკურენციის პირობებში ახალბედა სასტუმროსთვის უკვე წარმატებაა.
ეკონომიკური დამოუკიდებლობა და ბიზნესის წარმოება ძალიან გცვლის:
გადაწყვეტილებებს თავად იღებ, შინაგანად კიდევ უფრო იხსნები და ხვდები, რომ სრულიად განსხვავებული შესაძლებლობები გიჩნდება.
საკუთარ თავს რომ ვუყურებ, ძალიან ამაყი ვარ, თუმცა ვიცი, კიდევ უფრო მეტის გაკეთება შემიძლია.
მინდა ეზოში მარანი გავაკეთო, დეგუსტაციები მოვაწყო და ღვინის ტურიზმი განვავითარო. მიღწეულზე გაჩერება არ მიყვარს. ყოველდღე ვკითხულობ, სიახლეებს ვიძიებ, რომ ინოვაციები დავნერგო“,- ვკითხულობთ თათია ხურციძის პოსტში.