ის პირდაპირ ითხოვს ადამიანების სახელებს, გვარებს და კაცმა არ იცის რის მოწყობას აპირებს, – ასე გამოეხმაურა ანალიტიკოსი, ლევან ნიკოლეიშვილი მიხეილ სააკაშვილის განცხადებას.
„სააკაშვილი რისი დავალების მიცემას აპირებს თავის ქვეშევრდომებზე კაცმა არ იცის. მას სურს, კიდევ ერთხელ არეულობა აქციოს რეალურად. ის არის ჩვეულებრივი დამნაშავე, რომელიც ბედავს და თითქოსდა ცდილობს, რომ ოჯახის წევრებზე გადაიტანონ ზეწოლა, ამაზე დიდი უბედურება რა უნდა იყოს“, – განაცხადა ლევან ნიკოლეიშვილმა.
მიხეილ სააკაშვილმა სამართალდამცველებს დოქსოპულოები უწოდა და განაცხადა, რომ „ამ კოსმონავტებს და დოქსოპულოებს დედა ჰყავთ პრინციპში. ყველას სახელი და გვარი ვიცით, ყველას მისამართს უნდა მივაკითხოთ, მივაკითხოთ ყველას ცალ-ცალკე, უნდა დავღალოთ, გავთანგოთ, გამოვფიტოთ“.
8 ნოემბერს ოპოზიციური პარტიების წარმომადგენლებმა პარლამენტთან საპროტესტო აქცია გამართეს და თავიანთი მოთხოვნები გააჟღერეს. მათ შორის არის: 31 ოქტომბრის არჩევნების შედეგების არალეგიტიმურად ცნობა, რიგგარეშე არჩევნების ჩატარება და ცენტრალური საარჩევნო კომისიის ხელახალი დაკომპლექტება. მოგვიანებით მათ ცესკოსთან გადაინაცვლეს.
ცესკოსთან სამართალდამცველებმა დემონსტრანტების მიმართ წყლის ჭავლი ორჯერ გამოიყენეს. ამას წინ უძღოდა დაპირისპირება და აგრესია პოლიციელების მიმართ.