“გირჩის” წევრის ვახტანგ მეგრელიშვილის შეფასებით, თუ პარტია “მოქალაქეების” ლიდერის ალეკო ელისაშვილისთვის პარლამენტში შესასვლელად საარჩევნო სისტემის რეფორმა საკმარისია, მისთვის ეს არის ინსტრუმენტი, რისთვისაც მას სჭირდება სხვა პოლიტიკური პარტიების თანადგომა.
ვახტანგ მეგრელიშვილი მიმდინარე პოლიტიკურ პროცესებს გამოეხმაურა და აღნიშნა, რომ რეალური პრობლემა ამ პროცესში ისაა, რომ არც ერთმა არ იცის, რატომ აგინებენ ერთმანეთს.
“ჩვენ მივილტვით იქითკენ, რომ შესრულდეს 20 ივნისის მოთხოვნები. 20 ივნისის მოთხოვნები მდგომარეობდა შემდეგში, რომ ამ ქვეყანაში ამიერიდან იყოს ნებისმიერ დონეზე, პარლამენტშიც, ადგილობრივ არჩევნებზეც პროპორციული, ბუნებრივი ბარიერიანი არჩევნები. რაც საშუალებას არავის აღარ მისცემდა დაეყენებინა ის მდგომარეობა, რაც დადგა 31 ოქტომბერს. მაგალითად ალეკოსთვის თუ ცესკოს რეფორმირება უკვე საკმარისია, ჩემთვის ეს არის ინსტრუმენტი იმ მიზნის მისაღწევად, რაც მე მჭირდება. ანუ ის, რაც ალეკოს მოსწონს, არის ჩემთვისაც მოსაწონი, მაგრამ შემადგენელი კომპონენტი იმის რისთვისაც მე ვიბრძვი და ამ ბრძოლაში მე მჭირდება სხვა პოლიტიკური პარტიებიც, გარდა ალეკოსი და ამ ბრძოლაში მე მჭირდება “ნაციონალური მოძრაობაც” კი. ანუ, ეს უნდა იყოს დისკუსიის, მსჯელობის შედეგად შემდგარი კონსენსუსი და არა ერთმანეთისთვის დედისტრაკის გინება. ანუ, რეალურად ახლა გვაქვს პრობლემა იმაში, კაციშვილმა არ იცის, ვინ რატომ აგინებს ერთმანეთს დედას,” – განაცხადა ვახტანგ მეგრელიშვილმა.
ცნობისთვის, ელისაშვილმა დღეს, საკუთარ გვერდზე გავრცელებულ ვიდეომიმართვაში აღნიშნა, რომ “ევროპული საქართველო”, ფასილიტატორი ელჩების ჩართულობით, “ქართულ ოცნებასთან მიმდინარე მოლაპარაკებების ჩაშლას და დეტალების გარეთ გამოტანას ცდილობს. ელისაშვილის შეფასებით, “ბოკერია და უგულავა საბოტაჟით არიან დაკავებული”.
გარდა ამისა, ელისაშვილმა აღნიშნა, რომ რომ ის დათანხმდება პარლამენტში შესვლას იმ შემთხვევაში, თუ მხარეები საარჩევნო კანონმდებლობის და საარჩევნო ადმინისტრაციის რეფორმაზე შეთანხმდებიან.