კობახიძემ თქვა, რომ დეპუტატები თუ დაწერენ განცხადებას მანდატების შეწყვეტაზე, მაშინ შევუწყვეტთო, რასაც ვეთანხმები. ადრე ვაკრიტიკებდი ირაკლი კობახიძეს, როცა სხვანაირად ამბობდა, ამ შემთხვევაში მე მას ვეთანხმები, – ამის შესახებ „გირჩის“ ერთ-ერთმა ლიდერმა იაგო ხვიჩიამ ჟურნალისტებს „ლელოს“ ოფისში ოპოზიციური პარტიების ლიდერების შეხვედრის დაწყებამდე განუცხადა.
მისივე თქმით, თუ ადამიანი წერს განცხადებას რაღაცის შეწყვეტაზე, მაშინ უნდა დაუკმაყოფილო.
გარდა ამისა, იაგო ხვიჩიამ განაცხადა, რომ საგამოძიებო კომისიის შექმნა, ირაკლი კობახიძეს ოპოზიციისთვის პარლამენტში შესვლის სანაცვლოდ არ შეუთავაზებია და კომისიის შექმნის იდეა კარგია.
„ზოგადად საგამოძიებო კომისიის იდეა კარგია, როგორც გამოსავალი, მაგრამ ამ კომისიას უნდა ჰქონდეს ნდობა და იმისთვის, რომ საგამოძიებო კომისიას ჰქონდეს ნდობა, უნდა იყოს კონსენსუსის შედეგად შექმნილი და არ უნდა იყოს ცალმხრივი, სადაც ერთი პარტია არის ყველაფერი. ამიტომ გააჩნია, როგორ მივალთ ამ წინადადებამდე, მაგრამ თავად წინადადებაში, რომ საგამოძიებო კომისიით რაღაცებზე ვილაპარაკოთ, უაზრობა არ არის, უბრალოდ, გააჩნია როგორ გავაკეთებთ ამას. საგამოძიებო კომისიის შექმნა ირაკლი კობახიძეს პარლამენტში შესვლის სანაცვლოდ არ შემოუთავაზებია, სანაცვლოდ შემოთავაზებულია სხვა რაღაცები, რომელიც მოლაპარაკების მაგიდაზე დევს“, – განაცხადა იაგო ხვიჩიამ.