საქალაქო სასამართლოს ყოფილი თავმჯდომარე, მამუკა ახვლედიანი გავრცელებულ ფარულ ჩანაწერში უჩვეულოს ვერაფერს ხედავს.
“ჩემი მოსამართლეობის პერიოდშია გაკეთებული ეს ჩანაწერი და მეტი კანონდარღვევა რა უნდა მოხდეს, თუ მოსამართლეებსაც უსმენენ ამ ქვეყანაში. რა დამოუკიდებელ გადაწყვეტილებებს ვთხოვთ მოსამართლეებს, თუ ასე უსმენენ. მართლა ვერ ვიხსენებ იმ სიტუაციას, რომელიც ჩანაწერშია აღწერილი. ტექსტიც არ მახსოვს ზუსტად. ეს არ არის სატელეფონო საუბარი, საუბარია ჩვეულებრივ სიტუაციაში. ამ პრობლემაზე ვსაუბრობ ტელევიზიითაც. არაფერი განსაკუთრებული იქ არ არის. მთავარია, ვინ იწერს ამ ყველაფერს და შემდეგ ავრცელებს”, – განუცხადა ახვლედიანმა “პირველს”.
რაც შეეხება უზენაესო სასამართლოს თავმჯდომარეს, რომელსაც ჩანაწერში ახვლედიანი “სავარჯიშო ბალიშად” მოიხსენიებს, საქალაქო სასამართლოს ყოფილი თავმჯდომარე კოლეგას არაკომპეტენტურს უწოდებს და ამბობს, რომ მან არ იცის სასამართლოს მართვა.
“სხვა არაფერი მითქვამს, გარდა იმისა, რომ უუნაროა და ვერაფერს აკეთებს სასამართლო სისტემაში”, – აღნიშნა ახვლედიანმა.
შეგახსენებთ, ტელეკომპანია “რუსთავი 2”-ის გენერალური დირექტორისა და საქალაქო სასამართლოს ყოფილი თავმჯდომარის ფარული აუდიოჩანაწერი რამდენიმე საათის წინ გავრცელდა. აუდიოჩანაწერში საქალაქო სასამართლოში შექმნილ ვითარებაზეა საუბარი, სადაც მამუკა ახვლედიანი უზენაესი სასამართლოს თავმჯდომარეს ნინო გვენეტაძეს “სავარჯიშო ბალიშად” მოიხსენიებს, სისტემაში საქმეების რაოდენობის კუთხით შექმნილ ვითარებას კი, “კატასტროფად” აფასებს.
აღნიშნულ ჩანაწერს უკვე გამოეხმაურა ნიკა გვარამია.
“ეს ფსკერია უკვე, ძვირფასო მეგობრებო. მთავარია დადონ რამე, სადაც ჩემი ხმა ისმის, და უკვე შინაარს აღარც უსმენენ. ამას ქვია ფარული ჩანაწერებით თვითდაზიანება. p.s. მე რომ პირადი ცხოვრება აღარა მაქვს ამ ქვეყანაში, ეგ უკვე არახალია”, – წერს გვარამია სოციალურ ქსელში.
კომენტარები