4 წლის განმავლობაში ყველაზე მეტი ვიდეოჯარიმა დეპუტატების, დავით ონოფრიშვილისა და შალვა კიკნაველიძის სარგებლობაში არსებულ ავტომობილებზე გამოიწერა 2012-2016 წლებში, ავტოსაგზაო წესების დარღვევის ფაქტზე, ყველაზე მეტი ვიდეოჯარიმა პარლამენტის დეპუტატების, დავით ონოფრიშვილისა და შალვა კიკნაველიძის სარგებლობაში არსებულ ავტომობილებზე გამოიწერა”, – ამის შესახებ პარლამენტის ინფორმაციაზე დაყრდნობით, ორგანიზაცია „თავისუფლების განვითარების ინსტიტუტი“ აქვეყნებს.
ორგანიზაციის კვლევის თანახმად, 4 წლის განმავლობაში, დავით ონოფრიშვილისა და შალვა კიკნაველიძის სარგებლობაში არსებულ ავტომობილებზე ოთხ-ოთხი ჯარიმა გამოიწერა. IDFI -ს მიერ პარლამენტიდან გამოთხოვილი ინფორმაციით ირკვევა, რომ 2012-2016 წლებში აპარატის ბალანსზე არსებული ავტომობილებით სარგებლობისას, 34 დეპუტატის ავტომანქანაზე სულ 63 ვიდეოჯარიმა გამოიწერა. ყველაზე მეტი – 27 ვიდეოჯარიმა 2013 წელს გაფორმდა. სხვა წლების სტატისტიკა ასე გამოიყურება: 2012 – 18, 2014 – 8, 2015 – 7, 2016 (6 თვე) – 3 ჯარიმა.
“3-3 ვიდეოჯარიმა ფიქსირდება გუბაზ სანიკიძის, გოგი თოფაძის, ზურაბ ტყემალაძის, გიორგი ცაგარეიშვილის, ირაკლი ჩიქოვანის, მანანა კობახიძისა და პაატა კიკნაველიძის სარგებლობაში არსებულ ავტომობილებზე. პარლამენტის თავმჯდომარის, დავით უსუფაშვილის შემთხევაში – ორი ვიდეოჯარიმა. საქართველოს პარლამენტის აპარატის განმარტებით, ვიდეოჯარიმის გადახდის ვალდებულება დაეკისრათ შესაბამისი ავტომობილების მძღოლებს და არა პარლამენტის აპარატს. IDFI-მ ასევე შინაგან საქმეთა სამინისტროდან გამოითხოვა ინფორმაცია 2012-2016 წლებში საპატრულო პოლიციის მიერ ავტომობილების მფლობელებზე დაკისრებული ვიდეოჯარიმების შესახებ, მათ შორის სახელმწიფო უწყებების განკარგულებაში არსებულ, მინისტრებისა და მათი მოადგილეების დროებით მფლობელობაში გადაცემულ ავტომობილებზე განცალკევებით. შინაგან საქმეთა სამინიტროს ცნობით, 2012 წლიდან ავტომობილების მფლობელებზე გამოწერილი ვიდეოჯარიმების საერთო ოდენობა ყოველწლიურად მატულობს: 2012 წელი – 140,432 ვიდეო ჯარიმა; 2013 წელი – 256,391; 2014 წელი – 275,953; 2015 წელი – 294,558; 2016 წლის პირველ ექვს თვეში – 161,960 ვიდეოჯარიმა”, – ნათქვამია IDFI-ს მიერ გამოქვეყნებულ დოკუმენტში.