საქართველო არ უნდა იყოს ორმხრივ პოლარიზაციაში, რაც მთავრობას მუშაობის საშუალებას არ აძლევს, – განაცხადა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჟოზეფ ბორელმა.
„მედიაციის ძალისხმევა ჯერ არ დასრულებულა. ჩვენ უნდა განვაგრძოთ პროცესის მხარდაჭერა. უნდა განვაგრძოთ მედიაცია. საქართველო არ უნდა იყოს ორმხრივ პოლარიზებულ გარემოში. ეს მთავრობას მუშაობის საშუალებას არ აძლევს. ქვეყანას სტაბილურობა სჭირდება, რათა მნიშვნელოვანი რეფორმები განხორციელდეს. მოვუწოდებთ ყველა პოლიტიკურ პარტიას, იხელმძღვანელონ ქვეყნის, ქართველი ხალხის ინტერესებით და მიაღწიონ საჭირო პოლიტიკურ შეთანხმებას, რათა უპასუხონ მათ წინაშე არსებულ მნიშვნელოვან გამოწვევებს“, – აღნიშნა ჟოზეფ ბორელმა.
ევროპული საბჭოს პრეზიდენტმა, შარლ მიშელმა განაცხადა, რომ მისი წარმომადგენელი, კრისტიან დანიელსონი საქართველოში მედიაციის გასაგრძელებლად დაბრუნდება.