სიტუაციას ვაკონტროლებთ, ყოველდღიურად ვაკვირდებით მიმდინარე მოვლენებს, მოსახლეობას პანიკის საფუძველი არ აქვს, – ამის შესახებ კახა კალაძემ ვაშლიჯვარში ნაპრალზე საუბრისას განაცხადა. მთავრობის სხდომაზე დედაქალაქის მერმა აღნიშნა, რომ გარკვეული მედიასაშუალებები ამ ფაქტთან დაკავშირებით დეზინფორმაციას ავრცელებენ და მიზანმიმართულად პანიკას თესავენ.
„კიდევ ერთხელ მინდა მოვუწოდო ამ მედიასაშუალებებს, რომ თავი შეიკავონ გადაუმოწმებელი და არასწორი ინფორმაციის გავრცელებისგან. პირველი, რაზეც იყო საუბარი, იყო ის, თითქოს დედაქალაქის მერიამ დამალა ეს პრობლემა ან პირიქით, არც იცოდა ამის შესახებ. ჩვენ ვსაუბრობთ პრობლემაზე, რომელიც რამდენიმე ათწლეულია არსებობს დედაქალაქში. რა თქმა უნდა, ჩვენც ვიცოდით ამ პრობლემის შესახებ. მეტიც, ეს ყველაფერი ჩვენს ოფიციალურ ვებგვერდზე ატვირთული იყო და ნებისმიერ ადამიანს ჰქონდა შესაძლებლობა, ენახა ინფორმაცია ყველა იმ პრობლემურ ადგილთან დაკავშირებით, რომელიც, სამწუხაროდ, გვაქვს დედაქალაქში“, – აღნიშნა კალაძემ.
მისივე თქმით, შექმნილია სამუშაო ჯგუფი, რომელიც ადგილზე ვითარებას სწავლობს. მერმა აღნიშნა, რომ ჯგუფთან ერთად მუშაობას სხვა ექსპერტებიც შეძლებენ, რომლებიც დედაქალაქში მეწყრულ ადგილებს სწავლობენ.
„მინდა ჩემს მოადგილეს, ირაკლი ბენდელიანს დავავალო, რომ ეს ადამიანები ჩავრთოთ ამ სამუშაო ჯგუფში. ისინი ცუდს არაფერს გააკეთებენ, პირიქით, უფრო საინტერესო ინფორმაციას მოგვაწვდიან, რათა ერთობლივი ძალებით მოვაწესრიგოთ და რაც შეიძლება სწრაფად მოვაგვაროთ არსებული პრობლემა“, – განაცხადა კალაძემ.
მისივე თქმით, ამ ეტაპზე სამუშაო ჯგუფი გერმანელ ექსპერტთან ადგილზე მუშაობს. მათ უკვე გადაწყვიტეს, რომ ადგილზე სპეციალური მონიტორინგის სისტემა დამონტაჟდება.
გასული წლების განმავლობაში, მუხრან მაჭავარიანის ქუჩასა და მიმდებარე ფერდებზე განხორციელებული გარკვეული მოქმედებების გამო, მეწყრული პროცესები გააქტიურდა. მოსახლეობის უსაფრთხოების მიზნით, 16 მარტიდან ამ ტერიტორიაზე საავტომობილო მოძრაობა ორმხრივად შეიზღუდა.
ადგილობრივ სპეციალისტებთან ერთად ადგილზე გერმანელი ინჟინერ-გეოლოგებიც მუშაობენ, რომლებმაც უკვე აღნიშნეს, რომ ქართული მხარის მიერ ფერდობზე მიღებული ზომები აბსოლუტურად სწორია.