მინდა, გამოვეხმაურო აშშ-ის სენატში, გუშინ საქართველოს საკითხზე მოსმენების პროცესს, რომელიც ეხებოდა ჩვენს ქვეყანას და მიმდინარე პოლიტიკურ პროცესებს, – ამის შესახებ კულტურის მინისტრმა მედიის წარმომადგენლებს განუცხადა.
„თუკი ვიქნებით ობიექტურები და თვალს არ დავხუჭავთ რეალობებზე, რამდენიმე რამ არის ნათელი. ამერიკულმა პოლიტიკურმა სპექტრმა ქართულ ოპოზიციას, მკაფიო გზავნილები გამოუგზავნა და რა თქმა უნდა, მკაფიო გზავნილები მოგვცა ჩვენც. ქართული ოპოზიციისადმი მკაფიო გზავნილები, თუ გამოსვლებს კარგად მოუსმინეთ, იყო შემდეგი: ამერიკულმა მხარემ, ქართულ ოპოზიციას და ჩვენს საზოგადოებას უთხრა ცალსახად, რომ „ქართული ოცნება 2012 წლიდან დღემდე არის მკაფიოდ პროდასავლურ კურსზე და ამ კურსისთვის არასდროს გადაუხვევია“, – განაცხადა წულუკიანმა.
მინისტრის განცხადებით, აშშ-ის პოლიტიკურმა სპექტრმა თქვა, რომ ასევე ის ეყრდნობა ეუთო/ოდირის შეფასებებს.
„ეუთო/ოდრისა და ყველა სხვა საერთაშორისო დამკვირვებლის შეფასებით, 31 ოქტომბრის არჩევნები იყო თავისუფალ გარემოში ჩატარებული, კონკურენტული და შესაბამისად აკმაყოფილებდა დემოკრატიის სტანდარტებს. ამას არ ვამბობ მე და არც ჩემი გუნდის რომელიმე წევრი, ეს ითქვა ამერიკული მხარის მიერ. თუკი არ გვინდა, ვიყოთ ბრმები და გვინდა დავინახოთ რეალობა, ეს ნამდვილად ასეა. ასევე ამერიკულმა პოლიტიკურმა სპექტრმა ჩვენს ოპოზიციას უთხრა ის, რაც მნიშვნელოვანია ჩვენი დემოკრატიული პროცესისთვის, რომ ოპოზიცია პარლამენტში უნდა შევიდეს. დიდი იმედი მაქვს, რომ ოპოზიცია სწორედ ასე გააკეთებს. რადგან როგორც ამერიკელებმა ჩვენს ოპოზიციას უთხრეს, მათი პარლამენტში არშესვლა, პირდაპირ ასხამს რუსულ წისქვილზე წყალს“, – განაცხადა წულუკიანმა.
მან ასევე ოპოზიციას შეახსენა, რომ საქართველო ოკუპირებული ქვეყანაა და უნდა ვიზრუნოთ სამშობლოზე, რათა უნებლიეთ არ გავხდეთ რუსული ინტერესების გამტარებელი.
„ოპოზიციის ფუნქცია არაა ქვეყანაში არეულობის გამოწვევის მცდელობა და ამით რუსულ წისქვილზე წყლის დასხმა. დაბოლოს ამერიკულმა პოლიტიკურმა სპექტრმა თქვა, რომ ბატონმა ნიკა მელიამ, კანონი დაარღვია და ამიტომ ზის ციხეში“, – განაცხადა წულუკიანმა.