თვითონ ღალატს ჩადიან და შემდეგ არ მოსწონთ, როდესაც ამ ღალატს შევახსენებთ, ეს არ არის სამართლიანი და სწორი საქციელი, – ასე გამოეხმაურა რეგიონული პოლიტიკისა და თვითმმართველობის კომიტეტის თავმჯდომარე, სოზარ სუბარი სერგი კაპანაძის განცხადებას.
მისი თქმით, სერგი კაპანაძემ განმარტოს, რა იგულისხმება, როდესაც ამბობს, რომ არავინ უარყოფს, რომ ქართულმა მხარემ ცხინვალი დაბომბა და კასეტური ბომბები გამოიყენაო?!
„ეს არის სამშობლოს ღალატი. აი, პირდაპირ რას აბრალებენ საქართველოს: 2008 წლის 7 აგვისტოს საქართველოს სამხედრო ძალების მიერ ცხინვალის დაბომბვის გაუფრთხილებლად დაწყებით ესკალაცია ახალ, კერძოდ, ღია და სრულმასშტაბიანი საომარი მოქმედებების საფეხურზე გადავიდა. როდესაც სერგი კაპანაძე ამბობს, რომ ეს არ ნიშნავს ომის დაწყებასო, სრულმასშტაბიანი საომარი მოქმედებების საფეხურზე გადასვლა სხვა რას ნიშნავს, კეთილი ინებონ და განმარტონ. თვითონ ღალატს ჩადიან და შემდეგ არ მოსწონთ, როდესაც ამ ღალატს შევახსენებთ, ეს არ არის სამართლიანი და სწორი საქციელი. განმარტოს, რა იგულისხმება, როდესაც ამბობს, არავინ უარყოფს რომ ქართულმა მხარემ ცხინვალი დაბომბა და კასეტური ბომბები გამოიყენაო? ამის გამო ჟურნალისტებზე თავდასხმა, ან თავდასხმა იმ ადამიანებზე, რომლებიც მას ამ საკითხს სოციალურ ქსელებში არ უწონებენ, ეს არის უბრალოდ თავის დაძვრენის უსუსური მცდელობა საკუთარი დანაშაულიდან“, – განაცხადა სოზარ სუბარმა.