საქართველოს პრეზიდენტი პარლამენტშია. რიგგარეშე სესია, რომელზეც სალომე ზურაბიშვილი ყოველწლიური მოხსენებით უნდა წარსდგეს, ამ წუთებში იწყება. პირველად, ბოლო წლების განმავლობაში დარბაზში არ იქნება არც დებატი და არც საპასუხო გამოსვლები, რადგან მეათე მოწვევის პარლამენტში დღეს მხოლოდ ერთი ფრაქციაა, ეს არის “ქართული ოცნება”, რომლის თავმჯდომარესაც კორონავირუსი დაუდასტურდა. სიტყვა არ ექნება არც ოპოზიციას – “ევროპელ სოციალისტებს” და “მოქალაქეებს”.
“მოქალაქეების” ლიდერი ალეკო ელისაშვილი აცხადებს, რომ მას აინტერესებს, გაამახვილებს თუ არა პრეზიდენტი ყურადღებას შეწყალებაზე.
“ქვეყნის ეკონომიკასთან და უმუშევრობასთან და იმ მძიმე ყოფასთან დაკავშირებით რამე წარმოდგენა მაინც თუ აქვს, ესეც გვაინტერესებს. უკრაინაზე მაინტერესებს მე პირადად,ექნება თუ არა რაიმე პოზიცია.
მაინტერესებს, აპირებს თუ არა ბოლოს და ბოლოს თავის თავს აღუდგინოს ერთ-ერთი მთავარი ვალდებულება, რაც მას ხალხმა მიანიჭა, როგორც ვიცით ექსკლუზიური დისკრეცია აქვს მას შეწყალების და შეჩერებული აქვს შეწყალების პროცესი. ეს ძალიან დიდ გაუგებრობას იწვევს,” – განაცხადა პარლამენტის წევრმა ალეკო ელისაშვილმა.
საპარლამენტო უმრავლესობაში კი მიიჩნევენ, რომ პრეზიდენტი ყველა მნიშვნელოვან საკითხზე ისაუბრებს.
“დარწმუნებული ვარ, რომ პრეზიდენტის გამოსვლაში იქნება ასახული ყველა ის მნიშვნელოვანი საკითხები, რომელიც დღეს ჩვენი ცხოვრების დღის წესრიგში დგას. ეს შეეხება კოვიდთან დაკავშირებულ საკითხებს, შეეხება იმ პოლიტიკურ ვითარებას, რომელიც დღეს საქართველოში არის შექმნილი,” – აღნიშნა საპარლამენტო უმრავლესობის წევრმა ირაკლი ქადაგიშვილმა.