მდინარე ენგურის გამოყენებით, ცენტრალური ხელისუფლების კონტროლირებად ტერიტორიაზე გადმოსვლა ერთადერთი მიზნით ხორციელდება. ეს მიზანია, რომ თავი აარიდონ კონტაქტს საოკუპაციო რეჟიმთან, – ამის შესახებ „იმედის კვირაში“ სახელმწიფო უსაფრთხოების სამსახურის საინფორმაციო-ანალიტიკური დეპარტამენტის დირექტორმა გიორგი საბედაშვილმა განაცხადა.
„გალის მოსახლეობა ცდილობს თავი აარიდოს უკანონო დაკავებებს, ასევე სხვა უკანონო აქტივობებს რაც შესაძლოა მათ წინააღმდეგ განხორციელდეს“, – აღნიშნა საბედაშვილმა.
40 000-ზე მეტი ადამიანი საქართველოს ოკუპირებულ ნაწილში ქართულ იდენტობას დღემდე უიარაღოდ იცავს. პრინციპულად არ ტოვებენ სახლებს და თაობებს ქართული ენის სიყვარულით ზრდიან. სახელმწიფო დახმარების ასაღებად, საკვების, მედიკამენტებისა თუ სხვა სასიცოცხლოდ აუცილებელი ნივთების შესაძენად კი ზუგდიდში გადმოსვლა უხდებათ. ბეწვის ხიდი – ასე შეარქვეს მათ მდინარე ენგურს. ამას რამდენიმე მიზეზი აქვს -ხიდი გახსნილი რომც იყოს, მოქალაქეს, რუსული პასპორტის გარეშე, ე.წ საზღვარზე არ უშვებენ. ან სანაცვლოდ, ითხოვენ თანხას, რომლის გადახდის საშუალება ყველას არ აქვს.
ოკუპირებული აფხაზეთის ტერიტორიაზე მცხოვრები, ტრაგიკულად დაღუპული საქართველოს მოქალაქეების ხსოვნის პატივსაცემად, 2021 წლის 10 აპრილი საქართველოში გლოვის დღედ გამოცხადდა.
7 აპრილს, საოკუპაციო ხაზთან, ქართული მხარის მიერ კონტროლირებად ტერიტორიაზე მდინარე ენგურმა 4 ცხედარი გამორიყა. გარდაცვლილების ნათესავების ინფორმაციით, გალის მკვიდრები სხვადასხვა საჭიროებისთვის, შემოვლითი გზით ცდილობდნენ ზუგდიდში გადმოსვლას, რა დროსაც სავარაუდოდ, მდინარე ადიდდა და ოთხივე დინებამ გაიტაცა.