„იმედის კვირა“ ახალციხეში კორონავირუსის საწინააღმდეგო ვაქცინის გაკეთების შემდეგ გარდაცვლილი მედიის საქმეზე ბრალდებულების ადვოკატებსა და ოჯახის წევრებს შეხვდა.
არცერთი ბრალდებული მედიასთან კომენტარს არ აკეთებს. მათი ადვოკატები კი, რომლებიც ჯერ კიდევ 8-ტომიანი საქმის შესწავლის ეტაპზე არიან, აცხადებენ, რომ საბოლოო შედეგზე გავლენა არ მოუხდენია იმას, კონკრეტულად ვინ გაუკეთა ადრენალინი პაციენტს.
რეგულირების სააგენტო ასევე ცდილობს დაადგინოს მიზეზ-შედეგობრივი კავშირი მეგი ბაქრაძის მდგომარეობის დამძიმებასა და ვაქცინას შორის. ამ შემთხვევით დაინტერესდა AstraZeneca-ც. ადვოკატების ინფორმაციით, კომპანიამ უკვე გამოითხოვა საქმის მასალები და ვაქცინის ამპულა.
2021 წლის 18 მარტს კორონავირუსზე „ასტრაზენეკას“ ვაქცინით აცრის შემდეგ ახალციხეში 27 წლის ექთანს მძიმე გვერდითი რეაქცია განუვითარდა. მას ადგილზე ჩაუტარდა გადაუდებელი დახმარება და მოთავსდა რეანიმაციაში, სადაც ხელოვნურ სუნთქვაზე გადაიყვანეს. იმავე დღეს ქალი თბილისში, პირველ საუნივერსიტეტო კლინიკაში გადმოიყვანეს, თუმცა ექიმებმა მისი გადარჩენა ვეღარ შეძლეს. მეგი ბაქრაძე 19 მარტს გარდაიცვალა. მომხდარზე შსს-მ გამოძიება დაიწყო.
7 აპრილს საქართველოს პროკურატურამ მედდის გარდაცვალების საქმეზე, გამოძიებისთვის ცრუ ინფორმაციის მიწოდების ფაქტზე „ახალციხის კლინიკა იმედის“ ექიმებს ბ.ლ.-ს, ვ.ი-ს და ექთანს თ.გ.-ს ბრალი წარუდგინა.