ახალ და ძველ პოლიტიკურ ძალებს ერთმანეთთან ქიშპი აქვთ და ფაქტობრივად რუსულ საქმეს აკეთებენ ისე, რომ თვითონაც ვერ ხვდებიან. ხოშტარიამ დროშა რომ მოიხურა და გავრილოვს შეუვარდა, მერე პარლამენტში რომ არ შედიოდა, რუსი რომ შემოსულიყო ნაკლები იყო, – ამის შესახებ მედიას ბოდბელმა ეპისკოპოსმა მეუფე იაკობმა 2019 წლის 20-21 ივნისის მოვლენების შეფასებისას განუცხადა.
„გავრილოვის ღამეზე“ ჩემს შეფასებას გეტყვით, როდესაც ვნახე, რომ გავრილოვი გააძევეს „ქორთიარდიდან“ და ძალებსაც შევხედე, რომელიც ხალხს პარლამენტისკენ წაუძღვა, აბსოლუტურად რუსული ძალები იყვნენ. სამოქალაქო საზოგადოება და პოლიტიკოსები ვინც ამბობდა წამოდითო, ყველა იყო რუსი. იქ არავითარი ქართული ძალა არ იყო. თუმცა აქციაზე მერე მივიდნენ გულანთებული ქართველი ახალგაზრდები, რომელთაც ჩვენზე მეტი ჭკუა აქვთ და სურთ წესიერ ქვეყანაში იცხოვრონ“, – განაცხადა მეუფე იაკობმა.
რუსთაველის გამზირზე 2019 წლის 20 ივნისს საპროტესტო აქციები მას შემდეგ დაიწყო, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა.