საქართველოს მინისტრთა კაბინეტის წევრებმა „იმედის კვირასთან“ თურქეთში ვიზიტი შეაჯამეს და ორ ქვეყანას შორის თანამშრომლობის მთავარი სფეროები დაასახელეს. ეკონომიკისა და მდგრადი განვითარების მინისტრი, ნათია თურნავა თბილისსა და სტამბოლს შორის ეკონომიკური თანამშრომლობის გაძლიერების პერსპექტივებს უსვამს ხაზს.
„დაახლოებით 1,8 მილიარდი სავაჭრო ბრუნვა გვქონდა ერთმანეთში პანდემიამდე. არის პერსპექტივა, რომ ახლო მომავალში ეს ბრუნვა 3 მილიარდამდე ავიყვანოთ. ეს გააძლიერებს საქართველოს და საინტერესოა თურქეთისთვის, იმიტომ რომ ურთიერთსაინტერესო და მომგებიანი კავშირები დგება ჩვენს ბიზნესებს შორის ვაჭრობისა და თანაინვესტირების პროცესში“, – განაცხადა თურნავამ.
პრემიერის ვიზიტის შემდეგ უკვე კონკრეტული ნაბიჯები გადაიდგა სოფლისა და გარემოს დაცვის სფეროებში. ლევან დავითაშვილს საპასუხო ვიზიტით თურქეთის დელეგაცია მისი კოლეგის ხელმძღვანელობით ეწვია. გაფორმდა მემორანდუმი და დაისახა მიზანი, რომლის თანახმადაც ქართული ხორცის ექსპორტზე თურქეთში გავა. უახლოეს პერიოდში იგეგმება შეთანხმება სატყეო სექტორსა და როგორც თევზჭერის, ისე აკვაკულტურისგანვითარების მიმართულებით.
„შავ ზღვაში მოპოვებული თევზი მნიშვნელოვან რესურსს წარმოადგენს. თურქეთი ამ მხრივ არის მსოფლიო ლიდერი ქვეყანა, რომელსაც აკვაკულტურის 1,2 მილიარდზე მეტი ექსპორტი აქვს და ამ კუთხით ტექნიკური გამოცდილების გაზიარება, კონკრეტული საკითხების გადაწყვეტა, თევზჭერის სამართლიანი პრინციპებით განხორციელება შავ ზღვაზე არის დიდი პრიორიტეტი“, – ამბობს დავითაშვილი.
საგარეო საქმეთა მინისტრს კი უმნიშვნელოვანეს გზავნილად მიაჩნია, საქართველოს ნატოში გაწევრიანების შესახებ რეჯეფ თაიფ ერდოღანის მხარდაჭერა. ის, რომ ალიანსის წევრი თურქეთი უახლოესს სამიტზე საქართველოს მთავარი ლობისტი იქნება. შეხვედრაზე შეთავაზება საქართველომაც გააჟღერა.
„თურქეთი-საქართველო-აზერბაიჯანი არის თანამშრომლობისა და გეოპოლიტიკური პროექტების განხორციელების კარგი მაგალითი. შესაძლოა, მსგავსი სახის ფორმატი ჩამოყალიბდეს საქართველოს, სომხეთსა და აზერბაიჯანს შორის და თბილისი იყოს ერთგვარი პლატფორმა დიალოგისთვის. ვისაუბროთ თუნდაც ეკონომიკურ პროექტებზე, რომელიც ხელსაყრელი იქნება სამივე ქვეყნისთვის; ვისაუბროთ ტურიზმზე და ეს კონკრეტული პროექტები სამ ქვეყანას შორის ნდობის გაღრმავების საშუალებად იქცეს“, – აღნიშნა დავით ზალკალიანმა.