საპროტესტო აქციების დროს ჯგუფური ძალადობის ორგანიზებისა და მასში მონაწილეობის ბრალდებით დაკავებული რვა პირის სასამართლო პროცესზე პროკურორმა ვაჟა თოდუამ მათ მიმართ წაყენებულ ბრალდებაზე დეტალურად ისაუბრა.
„აღნიშნული გარემოება დადასტურებული არის არაერთი მტკიცებულებით, მათ შორის ვიდეოჩანაწერით, სადაც ჩანს, რომ ბრალდებულები ვეფხია კასრაძე და ვასილ კაძელაშვილი გეგმავდნენ სხვადასხვა ძალადობრივ მოქმედებებს, ასევე უთითებდნენ, რომ თავიანთი მიზნების მისაღწევად აუცილებელია, ცეცხლის წაკიდების გზით გაანადგურონ სხვა პირთა ქონება. აღნიშნულ ვიდეოფაილზე დაინიშნა შესაბამისი ექსპერტიზა, რომლის დასკვნის თანახმად, ამ ვიდეოჩანაწერში, სადაც საუბარია ძალადობრივ მოქმედებებზე, საუბრობს სწორედ ვეფხვია კასრაძე და ვასილ კაძელაშვილი.
რაც შეეხება კიდევ ერთ, ჯგუფური ძალადობის ორგანიზატორ პირს, ზვიად ცეცხლაძეს, იგი ასევე მონაწილეობდა ძალადობრივი მოქმედებების ორგანიზებაში. იგი მოუწოდებდა ჯგუფური ძალადობის მონაწილე პირებს, აქტიურად განეხორციელებინათ ძალადობრივი მოქმედებები პოლიციელთა მიმართ და ამისათვის გამოეყენებინათ სხვადასხვა ნივთი, მათ შორის პიროტექნიკური ნაკეთობები და ქვები. საცხოვრებელი სახლის ჩხრეკის შედეგად ამოღებულ იქნა სწორედ ის ნივთები, რომლებზეც საუბრობს ის ვიდეოჩანაწერში და რომლებსაც იყენებდნენ ძალადობრივი მოქმედებების მონაწილე პირები აქციების დროს. მათ შორის გახლავთ ცეცხლგამჩენი მოწყობილობა, ე.წ. მოლოტოვის კოქტეილები, რომლებზეც დანიშნულია შესაბამისი ექსპერტიზა.
გიორგი გიორგაძე, ირაკლი მიმინოშვილი, ინსაფ ალიევი, თორნიკე გოშაძე, და ნიკოლოზ ჯავახიშვილი – მათ ბრალი ედებათ ჯგუფურ ძალადობაში მონაწილეობისათვის. მათგან ინსაფ ალიევი ქვას, ქვის ფილას და იქვე მოძიებულ საგნებს ესროდა პოლიციის თანამშრომლებს. ასევე ჯგუფური ძალადობის მონაწილეებთან ერთად საავტომობილო გზის ჩახერგვის მიზნით აწყობდა ბარიკადებს. რაც შეეხება ირაკლი მიმინოშვილს და ასევე გიორგი გიორგაძეს, ისინი ასევე აქტიურად მონაწილეობდნენ ძალადობრივ მოქმედებებში, ასევე ქვებს ესროდნენ პოლიციის თანამშრომლებს და არღვევდნენ საზოგადოებრივ წესრიგს. რაც შეეხება თორნიკე გოშაძეს, იგი ქვას და ასევე შუში ბოთლებს, ასევე სხვა საგნებს ესროდა სამართალდამცველებს და აქტიურ მონაწილეობას იღებდა ძალადობრივ მოქმედებებში. ხოლო რაც შეეხება ნიკოლოზ ჯავახიშვილს, იგი პიროტექნიკური ნაკეთობიდან ისროდა პოლიციელების მისამართით”, – განაცხადა პროკურორმა.
თბილისის საქალაქო სასამართლომ აღნიშნული რვა პირი, პატიმრობის გაუქმების ან შეცვლის გარემოების არარსებობის გამო, პატიმრობაში დატოვა.