მიკროავტობუსების განახლების პროგრამასთან დაკავშირებით, მინდა დადასტურებულად გითხრათ, რომ პირველი ივლისი იყო ის თარიღი, როდესაც უნდა დასრულებულიყო ჩვენ მიერ შეძენილი 300 ერთეული მიკროავტობუსის გამოსყიდვა. კომპანიამ ეს მიკროავტობუსები გამოისყიდა იმ ღირებულებით, რა ღირებულებითაც ჩვენ შევიძინეთ, – ამის შესახებ თბილისის მერმა, კახა კალაძემ დედაქალაქის მთავრობის სხდომაზე განაცხადა.
„ამ თანხით, უკვე დასრულებული ტენდერის საფუძველზე გავაფორმეთ ახალი ხელშეკრულება დამატებით 300 ერთეულის შესყიდვაზე და კომპანიის მიერ მოზიდული დამატებითი ფინანსური რესურსის ხარჯზე კომპანიამაც გააფორმა დამატებით 400 ერთეულის შესყიდვის ხელშეკრულება. წლის ბოლომდე მუნიციპალიტეტისთვის, 300 ერთეულის გარდა, დამატებით მოწოდებული იქნება 700 ერთეული მიკროავტობუსი და სრულად მოხდება ყვითელი მიკროავტობუსების პარკის ჩანაცვლება. ახალი მიკროავტობუსები წლის ბოლოდან მოემსახურებიან მოსახლეობას“, – განაცხადა კალაძემ.