საქართველოს შინაგან საქმეთა მინისტრი ვახტანგ გომელაური აცხადებს, რომ საქართველოს პრეზიდენტ სალომე ზურაბიშვილთან შეხვედრაზე 5-6 ივლისს თბილისში განვითარებულ მოვლენებთან დაკავშირებით ისაუბრეს.
მისი თქმით, პრეზიდენტი დაინტერესებული იყო დეტალებით, კონკრეტულად რა ღონისძიებები გატარდა.
„პრეზიდენტს შევხვდი. მას აინტერესებდა და მოვახსენეთ, როგორ განვითარდა 5-6 ივლისის მოვლენები. ჩავაყენეთ საქმის კურსში, რა ღონისძიებები ჩატარდა, რა გავაკეთეთ ჩვენ, რამდენი ადამიანი დაშავდა, მათ შორის სამწუხაროდ, ჟურნალისტები, რამდენი გამოძახება იყო, რამდენი ადამიანი გვყავს დაკავებული სისხლის სამართლის კოდექსით და ასევე ადმინისტრაციული წესით. ეს ყველაფერი დაწვრილებით მოვახსენეთ პრეზიდენტს. დაგვისვა კითხვები, კითხვებზე გავეცით პასუხი“, – განაცხადა ვახტანგ გომელაურმა.
ამასთან, როგორც ვახტანგ გომელაურმა აღნიშნა, 5 ივლისს რუსთაველის გამზირზე სპეცდანიშნულების რაზმი გამოყვანილი იყო.
„ზოგადად კითხვები ჩნდება, 5 ივლისს რატომ არ იყო გამოყვანილი სპეცდანიშნულების რაზმი. რომ არ იყო გამოყვანილი, ამას ვინ გეუბნებათ, არ ვიცი. სპეცნაზი გამოყვანილი იყო. სპეცდანიშნულების რაზმი არ არის ის, რომ მაინცდამაინც რობოკოპებში ჩაცმულებმა იარონ. ისინი ჩვეულებრივად არიან პოლიციელები. ეს ადამიანები გამოსული იყვნენ“, – განცხადა გომელაურმა.
საქართველოს პრეზიდენტისა და შინაგან საქმეთა მინისტრის შეხვედრა ორბელიანების სასახლეში შედგა.