“სირცხვილია” განცხადებას ავრცელებს და შინაგან საქმეთა სამინისტროს მიმართავს.
განცხადებას უცვლელად გთავაზობთ:
“სირცხვილიას” ოფისზე თავდასხმის საქმეზე ჩვენ უფლებებს “საერთაშორისო გამჭვირვალობა-საქართველო” დაიცავს. როგორც საზოგადოებისთვის ცნობილია, 2021 წლის 5 ივლისს რადიკალური დაჯგუფების წევრები თავს დაესხნენ სამოქალაქო მოძრაობა “სირცხვილიას” ოფისს, რა დროსაც ცდილობდნენ მასში შეჭრასა და დარბევას.
თავდამსხმელებმა დააზიანეს ორგანიზაციის ოფისის სადარბაზოს შიდა ინფრასტრუქტურა; შეიჭრნენ კორპუსის მაცხოვრებლების კერძო საკუთრებაში; პროფესიული მოვალეობის შესრულებისას ფიზიკურად გაუსწორდნენ ტვ პირველის გადამღებ ჯგუფს.
მოძრაობა “სირცხვილიას” ოფისზე განხორციელებული კანონსაწინააღმდეგო ფაქტებთან დაკავშირებით, შინაგან საქმეთა სამინისტრომ გამოძიება სისხლის სამართლის კოდექსის 187-ე მუხლით დაიწყო, რაც სხვისი ნივთის დაზიანებასა და განადგურებას გულისხმობს. თუმცა, ამ დრომდე, შესაბამისი უწყების წარმომადგენლებს ორგანიზაციის წევრები არ გამოუკითხავთ.
შინაგან საქმეთა სამინისტროს მოვუწოდებთ გამოკითხონ ჩვენი ორგანიზაციის ის წევრები, რომლებიც თავდასხმასთან დაკავშირებით ინფორმაციას ფლობენ.
ასევე, თავდამსხმელების იდენტიფიცირებისა და მათი სისხლისსამართლებრივი პასუხისმგებლობისათვის დროულად ჩაატარონ შესაბამისი საგამოძიებო მოქმედებები”, – აღნიშნულია განცხადებაში.