“ჩემი დაცვის ქვეშ მყოფი აღიარებს დაწვის ფაქტს, თუმცა, აცხადებს, რომ ეს მისი ავტომობილი იყო და დაწვა თავისი მანქანა”, – ამის შესახებ “კვირას” გორში მანქანის დაწვის ფაქტზე დაკავებული საკრებულოს დეპუტატის, კახა ბურჯანაძის ადვოკატმა, თამარ თედლიაშვილმა განუცხადა.
უფლებადამცველის განმარტებით, ავტომობილი დეპუტატმა გოგონას გარკვეული ვალდებულების სანაცვლოდ გადასცა, თუმცა, ვალდებულების დარღვევის შემდეგ მისი უკან დაბრუნება მოითხოვა, რაზეც გოგონა უარს ამბობდა, სწორედ ამიტომ გადაწყვიტა “ევროპული საქართველოს” წევრმა ავტომობილის დაწვა.
“აღნიშნული ავტომობილი მართვით გადაცემული ჰქონდა ქალბატონზე და ის იყენებდა მას. შემდეგ სთხოვა უკან დაბრუნება, რაზეც ქალბატონი უარს აცხადებდა. რამდენჯერმე პოლიციასაც მიმართა გოგონამ. ადმინისტრაციული წარმოება იყო დაწყებული, რომ სთხოვდა, დაებრუნებინა. ხშირად ურეკავდა, შეტყობინებებს წერდა, რომ დაებრუნებინა მანქანა. რომ ვერ მიაღწია თავის საწადელს, გადაწყვიტა, მანქანა დაეწვა. მანქანა ოფიციალურად გოგონას სახელზეა. ჩემი დაცვის ქვეშ მყოფსა და ამ გოგონას შორის გარკვეული ურთიერთობა არსებობდა, ოჯახის წევრი უნდა გამხდარიყო, მაგრამ ასე არ მოხდა და ვალდებული იყო, დაებრუნებინა ეს მანქანა სწორედ იმ ვალდებულების გათვალისწინებით, რა დათქმითაც იყო გადაცემული”, – განუცხადა “კვირას” თამარ თედლიაშვილმა.
პოლიცია გორის მუნიციპალიტეტის საკრებულოს წევრს, კახა ბურჯანაძეს ბრალდება სხვისი ნივთის განადგურებას ედავება.
გამოძიების ცნობით, ბრალდებულმა მიმდინარე წლის 8 ივლისს, ქალაქ გორში, ერთ-ერთ ქუჩაზე მდგომ ავტომობილს, ამავე ავტომობილის მფლობელთან მ.კ-სთან არსებული უთანხმოების ნიადაგზე ცეცხლი წაუკიდა. გამოძიება საქართველოს სსკ-ის 187-ე მუხლის მე-2 ნაწილის “ა” ქვეპუნქტით მიმდინარეობს, რაც ცეცხლის წაკიდებით ნივთის დაზიანების ან განადგურებას გულისხმობს.