„თბილისი პრაიდის” ოფისში შეჭრისთვის ბრალდებული სამი პირის საქმის პროკურორის ნათია გურულის განცხადებით, დაკავებულების ქმედებები სახელმწიფო ინტერესების წინააღმდეგ მიმართული ქმედებაა. აღნიშნულის შესახებ პროკურორმა საკუთარ შუამდგომლობაში განაცხადა.
ბრალდების მხარე ალიკა ალაზოვის, გიორგი ელისბარაშვილის და გიორგი ოძელაშვილის მიმართ აღკვეთის ღონისძიების სახით პატიმრობის გამოყენებას ითხოვს. გურულის თქმით, საგამოძიებო მოქმედებისას ბრალდებულებმა განაცხადეს, რომ დანაშაულს არ ნანობენ, თავისუფლებაში ყოფნისას კი ისინი დიდი ალბათობით კვლავ შეეცდებიან დანაშაულებრივი ქმედებების ჩადენას.
პროკურორის განმარტებითვე, მაღალი რისკია მტკიცებულებების განადგურების. მისივე თქმით, ორგანიზებულ ძალადობაში ბრალდებულების გარდა არაერთი პირი მონაწილეობდა და შესაძლია, მათ მოწმეებზე თუნდაც თხოვნით, ან იძულების გზით მოახდინონ ზეგავლენა. პროკურორის განმარტებით, ნაკლებად შემზღუდავი ღონისძიება ხელსაყრელიც კი შესაძლოა აღმოჩნდეს მათთვის, გაანადგურონ მტკიცებულება, ან მოსალოდნელი საფრთხე შეიმსუბუქონ. გურულის თქმითვე, ქმედების თავისებურებიდან და სასჯელის სიმკაცრიდან გამომდინარე, შესაძლოა, ისინი გამოძიებას მიემალონ, ვინაიდან მაღალი ალბათობით, ხანგრძლივი პატიმრობა ემუქრებათ.
პროკურორის განცხადებით, მათი ქმედებები დემონსტრაციულ ხასიათს ატარებდა. პროკურატურამ ასევე ყურადღება გაამახვილა ერთ-ერთი ბრალდებულის ალიკა ალაზოვის წარსულში ნასამართლეობაზე. გ
გამოძიების ინფორმაციით, “თბილისი პრაიდის” საწინააღმდეგოდ გამართული აქციის დროს, ბრალდებულები ალიკა ალაზოვი, გიორგი ელიზბარაშვილი და გიორგი ოძელაშვილი ორგანიზებულ ძალადობაში მონაწილე სხვა პირებთან ერთად, ჯგუფურად, შეუწყნარებლობის მოტივით თავს დაესხნენ „თბილისი პრაიდის“ ოფისს, სიტყვისა და აზრის გამოხატვის, ასევე მათი საზოგადოებრივი მოღვაწეობის შეზღუდვის მიზნით, უკანონოდ შეიჭრნენ ოფისში და დემონსტრაციულად დააზიანეს და გაანადგურეს „თბილისი პრაიდის“ კუთვნილი ინვენტარი.
ალიკა ალაზოვს, გიორგი ელისბარაშვილს და გიორგი ოძელაშვილს ბრალდება საქართველოს სისხლის სამართლის კოდექსის 160-ე მუხლის მეორე ნაწილის „ა“ და მესამე ნაწილის „ა“ ქვეპუნქტით (მფლობელობაში მფლობელის ნების საწინააღმდეგოდ უკანონოდ შესვლა, ჩადენილი ძალადობით და ძალადობის მუქარით, ჯგუფურად), 156-ე მუხლის მე-2 ნაწილის „ა“ ქვეპუნქტით (ადამიანის დევნა საზოგადოებრივ მოღვაწეობასთან დაკავშირებით, ჩადენილი ძალადობის მუქარით) და 225-ე მუხლის მე-2 ნაწილით (ჯგუფურ ძალადობაში მონაწილეობა) წარედგინათ.