საქართველოში ბრიტანულ შტამს ვირუსის ინდური ვერსია ანაცვლებს – ყოველდღიურად იმატებს დელტა შტამის დადასტურებული შემთხვევები.
კვლავ მძიმეა ჩვილი ბავშვების ჯანმრთელობის მდგომარეობა, რომლებიც “ციციშვილის ბავშვთა ახალ კლინიკაში” მკურნალობენ.
რთულ მდგომარეობაში მყოფი სამი ბავშვიდან, აფხაზეთიდან გადმოყვანილ ერთ ჩვილს კორონავირუსის ე.წ. ინდური შტამი აქვს. ერთს ბრიტანული, მესამე ბავშვზე კი კვლევა მიმდინარეობს.
“რეანიმაციაში მოთავსებულია სამი წლამდე ასაკის ბავშვი, 2 – 2 თვის და 1 – ახალშობილი, რომელიც 17 დღის არის. იმყოფებიან მართვით სუნთქვაზე, მათი მდგომარეობა სტაბილურად მძიმეა. მკურნალობის პროცესში, სხვადასხვა კლინიკურ-ლაბორატორიული კვლევის ცვლილებების მიხედვით ხდება მკურნალობის კორეგირება,” – განაცხადა ციციშვილის სახელობის ახალი კლინიკის სამედიცინო დირექტორმა მაია ჩხაიძემ.