შინაგან საქმეთა სამინისტრო მმართველი პარტიის ცენტრალურ ოფისთან მიმდინარე აქციის შესახებ განცხადებას ავრცელებს.
„შინაგან საქმეთა სამინისტროს თანამშრომლები თბილისში, პარტია „ქართული ოცნების” ოფისთან მიმდინარე აქციასთან დაკავშირებით, მობილიზებული არიან და იცავენ საზოგადოებრივ წესრიგს. მოვუწოდებთ აქციის მონაწილეებს, არ გასცდნენ შეკრებისა და გამოხატვის თავისუფლების კანონით დასაშვებ ფარგლებს. ამასთან, ვაფრთხილებთ აქციის ორგანიზატორებს, არ დაუშვან ძალადობისკენ მოწოდებები და უზრუნველყონ, რომ აქციებმა არ მიიღოს ძალადობრივი ხასიათი. შინაგან საქმეთა სამინისტრო უზრუნველყოფს საზოგადოებრივ წესრიგისა და უსაფრთხოების დაცვას. სამართალდარღვევის ფაქტებზე სამინისტრო შესაბამის სამართლებრივ რეაგირებას მოახდენს“, – აღნიშნულია უწყების განცხადებაში.
„ქართული ოცნების” ოფისთან ხმაურია. „ნაციონალური მოძრაობის“ ხელმძღვანელი ნიკა მელია და „ლელოს“ ლიდერები შენობაში შესვლას ცდილობენ, თუმცა ამის საშუალებას პოლიცია არ აძლევს. აქციის მონაწილეებმა ადგილზე წითელი საღებავი მიიტანეს, რითაც „ტვ პირველის” ოპერატორის ლექსო ლაშქარავას გარდაცვალებას აპროტესტებენ.