ამ წუთებში, თბილისის საქალაქო სასამართლოში, „თბილისი პრაიდის” საწინააღმდეგოდ გამართული აქციისას, ტელეკომპანია „ტვ პირველის“ ოპერატორზე, ლექსო ლაშქარავასა და ჟურნალისტ მირანდა ბაღათურიაზე ძალადობის ფაქტზე ბრალდებულის – დავით კუტალაძის სასამართლო პროცესი დაიწყო.
სასამართლო მისთვის აღკვეთის ღონისძიების შეფარდებაზე მსჯელობს. ბრალდების მხარემ სასამართლოს, აღკვეთის ღონისძიების სახით, პატიმრობის გამოყენებაზე უკვე მიმართა.
ბრალდება კუტალაძეს ჯგუფურ ძალადობას, ჟურნალისტურ საქმიანობაში ხელის შეშლასა და დევნის ფაქტზე ჩადენილი ძალადობისა და ძალადობის მუქარით ედავება.
ლექსო ლაშქარავასა და ამავე ტელეკომპანიის ჟურნალისტზე, მირანდა ბაღათურიაზე ძალადობის ფაქტზე, ამ დროისთვის, დაკავებულია ხუთი პირი, მათ შორის ოთხს პატიმრობა აქვს შეფარდებული. ჯამში, „თბილისი პრაიდის” საწინააღმდეგოდ გამართული აქციის საქმეზე 21 პირია ბრალდებული.
ოპერატორი ლექსო ლაშქარავა დაკრძალეს.