„ასტრაზენეკას“ ვაქცინის ეფექტიანობისა და უსაფრთხოების დასადგენად, კიდევ ერთი კვლევა ჩატარდა. „AZD1222-ის ვაქცინის უსაფრთხოება და რეაქტოგენურობა საუდის არაბეთში“ – ასე ჰქვია კვლევას, რომლის ფარგლებშიც, შემთხვევითი შერჩევით, 1 592 აცრილი პირი გამოიკვლიეს, – ამის შესახებ Arab News-ი წერს.
კვლევის შედეგების თანახმად, დაკვირვების პერიოდში, რაიმე მნიშვნელოვანი გვერდითი მოვლენა და სერიოზული ინფექცია არ გამოვლენილა.
გამოკვლეულთა 34.7%-ის შემთხვევაში, რეაქცია მხოლოდ პირველი ინექციის შემდეგ გამოვლინდა, მეორე დოზის მიღების შემდეგ კი, ცდის არც ერთ პირს არ ჰქონია რაიმე ტიპის რეაქცია.
რაც შეეხება გვერდით მოვლენებს უფრო ზუსტად; 30.5% აღენიშნებოდა ტკივილი ინექციის ადგილას, ძვალკუნთოვანი სისტემის რეაქცია კი გამოვლინდა 27.5%-ის შემთხვევაში. ამასთან, დადგინდა, რომ ტემპერატურის მატება კაცებში (62.4%) უფრო ხშირი იყო, ვიდრე – ქალებში (37.6).
ინფექცია 0.5%-ის შემთხვევაში გამოვლინდა, თუმცა, არცერთ შემთხვევაში, ჰოსპიტალიზაცია საჭირო არ გამხდარა.