Reuters აშშ-ს რესპუბლიკელი კონგრესმენების კვლევის შედეგებს აქვეყნებს, რომლის მიხედვითაც, მტკიცებულებები ადასტურებს, რომ კოვიდ-19-ის გამომწვევმა ვირუსმა ჩინეთის კვლევითი დაწესებულებიდან გაჟონა.
გამოცემის ინფორმაციით, ანგარიში წარმომადგენელთა პალატის „რესპუბლიკელმა“ წევრმა მაიკლ მაკკოლიმ წარადგინა.
დოკუმენტის თანახმად, „უამრავი მტკიცებულება“ არსებობს, რომ უჰანის ვირუსოლოგიის ინსტიტუტის მეცნიერები კორონავირუსების მოდიფიცირებაზე მუშაობდნენ.
„ახლა გვჯერა, რომ დროა, სრულად გამოვრიცხოთ ცხოველების ბაზარი, როგორც წყარო. ასევე მიგვაჩნია, რომ მტკიცებულებათა სიჭარბე ადასტურებს, რომ ვირუსმა უხანის ვირუსოლოგიის ინსტიტუტიდან გაჟონა და რომ ეს მოხდა 2019 წლის 12 სექტემბრამდე,“ – აღნიშნულია ანგარიშში.
ანგარიშის ავტორი კონგრესმენები კოვიდ-19-ის წარმოშობის შესახებ ორპარტიული გამოძიების ჩატარების ინიციატივით გამოდიან.
აღსანიშნავია, რომ ჩინეთი უარყოფს ზოგიერთი ექსპერტის მოსაზრებას გენეტიკურად მოდიფიცირებული კორონავირუსის უჰანის ლაბორატორიიდან გაჟონვის შესახებ. ოფიციალური პეკინი ასევ უარყოფს ბრალდებებს ვირუსის გაჟონვის ფაქტის დამალვასთან დაკავშირებითაც.