კორონავირუსის „დელტა“ შტამის გავრცელების ფონზე, აშშ-ში კორონავირუსის ახალი შემთხვევების დღიურმა მაჩვენებელმა გასული წლის ზაფხულის პიკის მაჩვენებლებს გადაუსწრო. ინფორმაციას ამის შესახებ აშშ-ის დაავადებათა კონტროლისა და პრევენციის ცენტრი ავრცელებს.
აშშ-ის დაავადებათა კონტროლისა და პრევენციის ცენტრის დირექტორის, როშელ ვალენსკის განცხადებით, ამჟამად აშშ-ში ყოველდღიურად საშუალოდ 70 000 ახალი შემთხვევა ფიქსირდება.
შედარებისთვის, გასული წლის ზაფხულს პიკის დროს აღნიშნული მაჩვენებელი 68 700 შემთხვევას შეადგენდა.
ეპიდაფეთქება იმ ადგილებში ფიქსირდება, სადაც ვაქცინაციის მაჩვენებლები დაბალია. კორონავირუსის „დელტა“ შტამი ახალი შემთხვევების ზრდას იწვევს. ამასთანავე, ვაქცინაციის მაჩვენებელი, რომელიც მნიშვნელოვნად შემცირდა, კვლავ ზრდას იწყებს.
აშშ-ის ზრდასრული მოსახლეობის 70%-მა კორონავირუსის საწინააღმდეგო ვაქცინების, სულ მცირე, ერთი დოზა მიიღო.
ჯონს ჰოპკინსის უნივერსიტეტის მონაცემებით, აშშ-ში კორონავირუსის შემთხვევების რიცხვმა 35 მილიონს გადააჭარბა.