კორონავირუსის „დელტა“ შტამის გავრცელების გამო, აშშ-ის ყოფილმა პრეზიდენტმა, ბარაკ ობამამ 60 წლის იუბილეზე დაპატიჟებული სტუმრების რიცხვი მკვეთრად შეამცირა. ინფორმაციას ამის შესახებ ბარაკ ობამას ოფიციალური წარმომადგენელი ავრცელებს.
„ღია სივრცეში აღნიშნული ღონისძიება თვეების წინ იყო დაგეგმილი, საზოგადოებრივი ჯანდაცვის ყველა გაიდლაინის შესაბამისად. გასული კვირის განმავლობაში „დელტა“ ვარიანტის გავრცელების გამო, პრეზიდენტმა გადაწყვიტა ღონისძიების მნიშვნელოვნად შემცირება და მას მხოლოდ ოჯახის წევრები და ახლო მეგობრები დაესწრებიან“, – განაცხადა აშშ-ის 44-ე პრეზიდენტის ოფიციალურმა წარმომადგენელმა.
აშშ-ის ყოფილ პრეზიდენტს, ბარაკ ობამას დღეს 60 წელი შეუსრულდა. თავდაპირველად დაგეგმილი იყო, რომ მის საიუბილეო წვეულებას 500-600 სტუმარი დაესწრებოდა, თუმცა კორონავირუსის „დელტა“ შტამის გავრცელების ფონზე, აღნიშნულ გეგმებს საზოგადოებაში უკმაყოფილება და კრიტიკა მოჰყვა.
კორონავირუსის „დელტა“ შტამის გავრცელების ფონზე, აშშ-ში კორონავირუსის ახალი შემთხვევების დღიურმა მაჩვენებელმა გასული წლის ზაფხულის პიკის მაჩვენებლებს გადაუსწრო.
აშშ-ის ზრდასრული მოსახლეობის 70%-მა კორონავირუსის საწინააღმდეგო ვაქცინების, სულ მცირე, ერთი დოზა მიიღო.
ჯონს ჰოპკინსის უნივერსიტეტის მონაცემებით, აშშ-ში კორონავირუსის შემთხვევების რიცხვმა 35 მილიონს გადააჭარბა.