რუსეთის საგარეო საქმეთა მინისტრმა თავი სახალხოდ შეირცხვინა და კიდევ ერთხელ აჩვენა მსოფლიოს, რომ კრემლს სიცრუის ტირაჟირების გასაოცარი უნარი გააჩნია. საქმე იმაშია, რომ 28 ივნისს სერგეი ლავროვმა აკადემიური სტატია გამოაქვეყნა, სადაც ფაქტების გადამოწმების გარეშე, მტკიცებით ფორმაში განაცხადა, თითქოს დასავლეთის სკოლებში ბავშვებს ასწავლიან, რომ ქრისტე ბისექსუალი იყო. წარმოუდგენელი სირცხვილია, როცა რუსეთის საგარეო საქმეთა მინისტრი აკადემიური ხასიათის სტატიას ჭორებზე დაყრდნობით წერს და მას ამაში საკუთარი ქვეყნის მედია ამხელს.
დამოუკიდებელი რუსული მედიასაშუალება „მედუზა“ ლავროვის სტატიით დაინტერესდა და ფაქტების გადამოწმება გადაწყვიტა. რუსმა ჟურნალისტებმა გაარკვიეს, რომ საგარეო საქმეთა მინისტრი „ტიკტოკში“ გამოქვეყნებული მხოლოდ ერთი ვიდეოს საფუძველზე ასკვნის, რომ „დასავლეთი გარყვნილია“. არადა, ვიდეოს ავტორი ავსტრალიელი ემალაინ ქეროლ საუზველია, რომელმაც პოსტი ჰეშთეგით „ტიკტოკის დედები“ ჩინური წარმომავლობის სოციალურ მედიაში დამოუკიდებლად განათავსა. ემალაინი სამი შვილის დედაა, რომელსაც უბრალოდ პატარა ბავშვების სასაცილო საუბრის გავრცელება სურდა. ემალაინის ერთ-ერთი შვილი ვიდეოში ამბობს, რომ ქრისტეს ყველა უყვარს. მცირეწლოვანმა ბავშვმა გადაწყვიტა, რომ რადგან ქრისტეს ყველა უყვარს და კაბა აცვია, ამიტომ ის გენდერს არ ცნობს. თავად ემალაინი და მისი მეორე შვილი ბავშვს ვიდეოშივე უთითებენ, რომ ის არასწორია და ასეთი რამ არ უნდა თქვას. დედა შვილს უმეორებს, რომ შეუძლებელია მას ეს სკოლაში ესწავლა. აი სწორედ ეს უწყინარი, ავსტრალიელების ოჯახური ვიდეო ლავროვის აკადემიურ სტატიაში დასავლეთის „გარყვნილებაში“ დადანაშაულების საფუძველი გახდა.
„მედუზამ“ ტიკტოკის ვიდეოს შესახებ შეგროვებული ფაქტები გამოაქვეყნა და თქვა, რომ რუსეთის საგარეო საქმეთა მინისტრი ცრუ ინფორმაციას ავრცელებს. ლავროვმა „მედუზას“ სტატიაზე პასუხს დუმილი არჩია, რადგან მას სათქმელი არაფერი აქვს. სამაგიეროდ, სამინისტროს პრესსპიკერი მარია ზახაროვა მინისტრს დიდი ენთუზიაზმით იცავდა. მან „მედუზა“ ტელეგრამ არხის საშუალებით „უცხოელ აგენტად“ მოიხსენია და ლავროვის დასაცავად გაურკვეველი წარმომავლობის სტატია მოიშველია, რომელშიც თითქოს უნდა დადასტურებულიყო, რომ დასავლეთის სკოლებში ბავშვებს ასწავლიან, რომ ქრისტე ბისექსუალი იყო. ზახაროვას მიერ ლავროვის დასაცავად გავრცელებული სტატია სინამდვილეში შოტლანდიას შეეხებოდა და არა კოლექტიურ დასავლეთს. უფრო მეტიც, სტატიაში სიტყვა ბისექსუალი ნახსენებიც კი არ იყო. სინამდვილეში, დასავლეთის სკოლებში მსგავსი არაფერი ისწავლება და ყოველივე მხოლოდ ლავროვის ფანტაზიის ნაყოფია.
სერგეი ლავროვის „აკადემიურ სტატიას“ ორ შესაძლო პრობლემამდე მივყავართ. პირველი – რუსეთის საგარეო საქმეთა მინისტრი იმდენად არაკომპეტენტურია, რომ აკადემიურ სტატიებში ჭორებს ეყრდნობა ან მეორე – კრემლისთვის არაფერი წმინდა არ არსებობს და რელიგიას პოლიტიკურ ინსტრუმენტად იყენებს. დასკვნებს ალბათ მკითხველი გააკეთებს, მაგრამ ერთი რამ უდავოა, რომ კრემლი მიზანმიმართულად ცდილობს სიცრუის გავრცელებით ხალხის შეცდომაში შეყვანას და რელიგიური გრძნობებით მანიპულირებას, მაშინ როცა თვითონ ტრადიციულ ღირებულებებს და ერთმორწმუნეობას ამოფარებულს საერთოდ არ აფიქრებს ოკუპირებულ რეგიონებში ქართველების დახოცვა, ქართული სოფლების, ეკლესიების და კულტურული ძეგლების მასობრივი განადგურება.
ლაშა გიგაური