აშშ-ის დაავადებათა კონტროლისა და პრევენციის ცენტრი (CDC) ორსულ ქალებს ვაქცინაციისკენ მოუწოდებს.
აშშ-ის იმ რეგიონებში, სადაც ეპიდემიამ კვლავ იფეთქა, საავადმყოფოებში ვირუსით სერიოზულად დაავადებული არავაქცინირებული მომავალი დედების რიცხვმა მკვეთრად იმატა.
ორსულ ქალებში მძიმე ავადმყოფობისა და კორონავირუსით გამოწვეული ორსულობის გართულებების, მათ შორის მუცლის მოშლისა და მკვდარი ნაყოფის შობის რისკი უფრო მაღალია.
აშშ-ის დაავადებათა კონტროლისა და პრევენციის ცენტრის მონაცემებით, ორსულ ქალებში ვაქცინაციის მაჩვენებლები დაბალია – მხოლოდ 23%-ს აქვს მიღებული ვაქცინის, სულ მცირე, ერთი დოზა.
„ვაქცინები უსაფრთხო და ეფექტურია და ვაქცინაციის გაზრდა არასდროს ყოფილა უფრო გადაუდებელი, რადგან უაღრესად გადამდები „დელტა“ ვარიანტის წინაშე ვდგავართ და კორონავირუსით გამოწვეულ მძიმე შედეგებს ვხედავთ არავაქცინირებულ ორსულ ქალებს შორის“, – აღნიშნა აშშ-ის დაავადებათა კონტროლისა და პრევენციის ცენტრის დირექტორმა, როშელ ვალენსკიმ.
ექსპერტები აცხადებენ, რომ ათიათასობით ორსული ქალის რეალური გამოცდილება აჩვენებს, რომ ვაქცინა უსაფრთხოა და ორსულობის დროს ვაქცინის მიღებამ ახალშობილები გარკვეული დაცვით შეიძლება უზრუნველყოს.