„ქართულმა ოცნებამ“ გრძელვადიანი მშვიდობა და სტაბილურობა მოიტანა. ამ სიტყვის ფასი დღეს განსაკუთრებით მნიშვნელოვანია, რადგან ჩვენი ხელისუფლებაში მოსვლის დროს დამკვიდრდა გრძელვადიანი სტაბილურობა და მშვიდობა“, – ამის შესახებ პრემიერ-მინისტრმა ირაკლი ღარიბაშვილმა „ქართული ოცნების“ სიღნაღის მერობის კანდიდატის, მალხაზ ბეგიაშვილის წარდგენაზე, სიტყვით გამოსვლისას განაცხადა.
მთავრობის მეთაურის თქმით, ყოფილი ხელისუფლების წარმომადგენლები დღესაც აგრძელებენ ქვეყანაში საბოტაჟისა და დესტრუქციის შემოტანას.
„ქართველებს კარგად გვესმის მშვიდობის ფასი. სწორედ დღევანდელ დღეს დაიწყო აფხაზეთში ომი. ეს ყველას გვახსენებს, რაოდენ დიდი ტკივილია ომი და ნგრევა, რომელსაც გამოუსწორებელი შედეგი მოაქვს. თითოეული ჩვენი მოქალაქისთვის, 90-იანი წლები მწარე გაკვეთილია. არც თუ ისე შორეულ წარსულში, 13 წლის წინ, აღნიშნული ტრაგედია თავიდან ვერ ავიცილეთ, ვერ აიცილა წინა ხელისუფლებამ. ამის შედეგად, დამატებით, დაიკარგა ტერიტორიები, ჩვენი ქვეყნის 20% არის ოკუპირებული, დაიკარგა ისეთი მნიშვნელოვანი ტერიტორიებიც, როგორებიცაა კოდორი, ახალგორი და 100-ზე მეტი სოფელი. ამ ყველაფრის თქმა მიწევს იმ ფონზე, როდესაც ჩვენი ოპონენტები, ჯერ კიდევ უტიფრად, ჩვენი ქვეყნის საბოტაჟსა დესტრუქცია აგრძელებენ. მძიმე მემკვიდრეობის შემქმნელები საბოტაჟის რეჟიმში ამყოფებენ მთელ ქვეყანას და ჯერ კიდევ გვიწევს ამ დესტრუქციასთან გამკლავება. ჩვენ ეს ვიხილეთ 6 თვის წინ, როცა ქვეყანა ხელოვნურ კრიზისში შეჰყავდათ“, – აღნიშნა მთავრობის მეთაურმა.